આધુનિક યુદ્ધમાં હવે માત્ર સરહદો જ નહીં, પરંતુ ડેટા સેન્ટર્સ અને ક્લાઉડ ઈન્ફ્રાસ્ટ્રક્ચર પણ વ્યૂહાત્મક લક્ષ્યાંકો બની રહ્યા છે. ઈરાન દ્વારા અમેરિકન ટેક કંપનીઓને નિશાન બનાવવાની ચેતવણી એ સંકેત આપે છે કે ભૌતિક હુમલાની સાથે હવે 'ડિજિટલ વોરફેર' પણ શરૂ થઈ ચૂક્યું છે. વિશ્વભરની અર્થવ્યવસ્થા અને સેવાઓ જે ડેટા સેન્ટર્સ પર ટકેલી છે, તેના પરનો હુમલો વૈશ્વિક સ્તરે ઇન્ટરનેટ અને સંચાર સેવાઓને ખોરવી શકે છે.

મધ્ય પૂર્વમાં ચાલી રહેલા યુદ્ધમાં એક નવો વળાંક આવ્યો છે. ઈરાને અમેરિકન ટેક કંપનીઓ પર હુમલો કરવાની આપેલી ધમકી બાદ, બહેરીનમાં આવેલા એમેઝોન વેબ સર્વિસીસ (AWS) ના ડેટા સેન્ટર પર હુમલો થયો હોવાના અહેવાલો પ્રાપ્ત થયા છે. આ ઘટનાને પગલે એમેઝોનની ક્લાઉડ સેવાઓમાં વિક્ષેપ પડ્યો છે.

હુમલાની વિગતો અને અસર

તાજેતરના અહેવાલો અનુસાર, બહેરીનમાં એમેઝોનના ડેટા સેન્ટરને સીધું નિશાન બનાવવાને બદલે તેની નજીકના વિસ્તારમાં ડ્રોન હુમલો કરવામાં આવ્યો હતો. આ વિસ્ફોટને કારણે ડેટા સેન્ટરના ઈન્ફ્રાસ્ટ્રક્ચરને નુકસાન પહોંચ્યું છે અને તેની કામગીરી પર માઠી અસર પડી છે. અગાઉ માર્ચ 2026ની શરૂઆતમાં પણ સંયુક્ત આરબ અમીરાત (UAE) માં એમેઝોનના બે ડેટા સેન્ટરો પર ડ્રોન સ્ટ્રાઈક થઈ હતી, જેમાં મોટી ભૌતિક નુકસાની અને આગ લાગવાની ઘટનાઓ બની હતી.

18 અમેરિકન કંપનીઓ ઈરાનના નિશાન પર

ઈરાનના રિવોલ્યુશનરી ગાર્ડ્સે સત્તાવાર રીતે ચેતવણી આપી છે કે તેઓ મેટા, ગૂગલ, એપલ, માઈક્રોસોફ્ટ, એનવીડિયા અને ટેસ્લા જેવી કુલ 18 મોટી અમેરિકન ટેક કંપનીઓને નિશાન બનાવશે. ઈરાનનો આરોપ છે કે આ કંપનીઓ ઈરાની નેતાઓની જાસૂસી અને લક્ષિત હત્યાઓમાં અમેરિકન ગુપ્તચર એજન્સીઓને મદદ કરી રહી છે.

વૈશ્વિક ચિંતા: ભારત પર શું અસર થશે?

એમેઝોન વેબ સર્વિસીસ (AWS) વિશ્વની સૌથી મોટી ક્લાઉડ પ્રોવાઈડર છે. ભારત સહિત વિશ્વના અનેક દેશોની બેંકો, સરકારી સેવાઓ અને મોટી કંપનીઓ પોતાનો ડેટા AWS પર સ્ટોર કરે છે. જો મધ્ય પૂર્વમાં આવેલા આ ડેટા સેન્ટરો સંપૂર્ણપણે ઠપ થાય, તો તેની અસર અન્ય ક્ષેત્રોના સર્વર પર પણ પડી શકે છે. હાલમાં એમેઝોન દ્વારા ગ્રાહકોને તેમનો ડેટા અન્ય સુરક્ષિત ક્ષેત્રો (Regions) માં ખસેડવાની સલાહ આપવામાં આવી રહી છે.

સુરક્ષા નિષ્ણાતો માને છે કે આ પ્રકારના હુમલાઓ ભવિષ્યમાં વૈશ્વિક ઈન્ટરનેટ કનેક્ટિવિટી માટે મોટો ખતરો સાબિત થઈ શકે છે.