ગુજરાતમાં આગામી સ્થાનિક સ્વરાજ્યની ચૂંટણીઓ માટે ઉમેદવારી ફોર્મ ભરવાના આજે અંતિમ દિવસે રાજકીય માહોલ ગરમાયો છે. ભારતીય જનતા પાર્ટીના પ્રદેશ પ્રમુખ જગદીશ વિશ્વકર્માએ વિશ્વાસ વ્યક્ત કર્યો છે કે છેલ્લા 30 વર્ષથી ગુજરાતની જનતાએ ભાજપ પર જે અતૂટ ભરોસો મૂક્યો છે, તે આ ચૂંટણીઓમાં પણ જળવાઈ રહેશે અને પાર્ટીને પ્રચંડ જનસમર્થન પ્રાપ્ત થશે.

ઉમેદવારી ફોર્મ ભરવાનો આજે છેલ્લો દિવસ

રાજ્યભરમાં સ્થાનિક સ્વરાજ્યની સંસ્થાઓની ચૂંટણી માટે નામાંકન પત્ર દાખલ કરવાની પ્રક્રિયા પૂરજોશમાં ચાલી રહી છે. આજે ઉમેદવારી ફોર્મ ભરવાનો છેલ્લો દિવસ હોવાથી તમામ રાજકીય પક્ષોના ઉમેદવારો અને અપક્ષો મોટી સંખ્યામાં ચૂંટણી અધિકારીની કચેરીએ પહોંચી રહ્યા છે. 

ગુજરાતની જનતાનો ભાજપ પર 30 વર્ષથી અતૂટ ભરોસો

ફોર્મ ભરવાના અંતિમ દિવસે મીડિયા સાથે વાતચીત કરતા ભાજપના પ્રદેશ પ્રમુખ જગદીશ વિશ્વકર્માએ પક્ષની ભવ્ય જીત અંગે દાવો કર્યો હતો. તેમણે પક્ષ અને પ્રજા વચ્ચેના સંબંધોની વાત કરતા સ્પષ્ટપણે જણાવ્યું હતું કે, ગુજરાતની જનતા અને ભારતીય જનતા પાર્ટી વચ્ચે વર્ષો જૂનો અતૂટ નાતો છે. છેલ્લા 30 વર્ષથી ગુજરાતના નાગરિકોએ સતત ભાજપ પર પોતાનો પૂર્ણ ભરોસો મૂક્યો છે અને વિકાસની રાજનીતિને સ્વીકારી છે.