જામનગર જિલ્લાના નવનિયુક્ત કલેક્ટર તરીકે પી.બી. પંડ્યાએ આજે વિધિવત રીતે પોતાનો કાર્યભાર સંભાળી લીધો છે. કલેક્ટર કચેરી ખાતે જરૂરી વહીવટી પ્રક્રિયાઓ પૂર્ણ કર્યા બાદ તેમણે જિલ્લાના મુખ્ય વહીવટી વડા તરીકેની જવાબદારી સ્વીકારી હતી. આ પ્રસંગે કલેક્ટર કચેરીના ઉચ્ચ અધિકારીઓ અને વિવિધ વિભાગના વડાઓ દ્વારા તેમનું પુષ્પગુચ્છ આપી ભાવભર્યું સ્વાગત કરવામાં આવ્યું હતું. પદભાર સંભાળતાની સાથે જ નવનિયુક્ત કલેક્ટરે જિલ્લાની ભૌગોલિક અને વહીવટી પરિસ્થિતિની પ્રાથમિક વિગતો મેળવી હતી.

રાજ્ય સરકારની લોકકલ્યાણકારી યોજનાઓનો અમલ છેવાડાના માનવી સુધી વધુ અસરકારક રીતે થાય અને પ્રજાના પ્રશ્નોનું ત્વરિત અને સચોટ નિરાકરણ આવે તે તેમની મુખ્ય કાર્યશૈલી રહેશે. આગામી સમયમાં યોજાનારી સ્થાનિક સ્વરાજ્યની સંસ્થાઓ જેવી કે કોર્પોરેશન, પંચાયત અને નગરપાલિકાની ચૂંટણીઓ પર વિશેષ ભાર મૂકતા કલેક્ટરશ્રીએ જણાવ્યું હતું કે, આ ચૂંટણીઓ સંપૂર્ણ પારદર્શિતા, સફળતા અને સુચારૂ રીતે પાર પડે તે વહીવટી તંત્રની સર્વોચ્ચ પ્રાથમિકતા રહેશે.

જામનગર જિલ્લાના સર્વાંગી વિકાસ માટે તંત્રના તમામ વિભાગો સાથે સંકલન સાધીને પારદર્શક અને ગતિશીલ વહીવટ પૂરો પાડવાની તેમણે ખાતરી આપી હતી. જનતાના કામોમાં ઝડપ લાવવા અને વહીવટને વધુ પ્રજાભિમુખ બનાવવાના સંકલ્પ સાથે તેમણે જિલ્લાના વિકાસ કાર્યોને નવી ગતિ આપવાની નેમ વ્યક્ત કરી હતી. આ પદભાર ગ્રહણ કરવાના પ્રસંગે જિલ્લા વહીવટી તંત્રના વરિષ્ઠ અધિકારીઓ, કર્મચારીગણ અને વિવિધ ક્ષેત્રના અગ્રણીઓ મોટી સંખ્યામાં ઉપસ્થિત રહ્યા હતા અને નવા કલેક્ટરને શુભેચ્છાઓ પાઠવી હતી.