પોતાના બેબાક અને નિડર નિવેદનો માટે જાણીતી અભિનેત્રી તથા રાજકારણી કંગના રનૌતે ફરી એકવાર બોલીવુડની કાર્યપદ્ધતિ પર નિશાન સાધ્યું છે. કંગનાએ પોતાની લેટેસ્ટ ઇન્સ્ટાગ્રામ પોસ્ટમાં ગંભીર આક્ષેપ કરતા જણાવ્યું છે કે ભારતીય ફિલ્મ ઉદ્યોગમાં સુપરસ્ટાર્સ દ્વારા ફિલ્મ નિર્માતાઓને ધમકાવવામાં આવે છે અને તેમને પૂરતું શ્રેય આપવામાં આવતું નથી.

હોલીવુડની સરખામણીમાં ભારતીય ડિરેક્ટર્સની સ્થિતિ દયનીય 

તાજેતરમાં રિલીઝ થયેલી ફિલ્મ "ધુરંધર 2" ની જબરદસ્ત સફળતા બાદ કંગનાએ ફિલ્મના દિગ્દર્શક આદિત્ય ધરની પ્રશંસા કરતા એક લાંબી પોસ્ટ લખી હતી. આ પોસ્ટમાં તેણે હોલીવુડ અને બોલીવુડની કાર્યપદ્ધતિ વચ્ચેનો તફાવત દર્શાવતા લખ્યું હતું કે, હોલીવુડમાં સ્પીલબર્ગ, ટેરેન્ટિનો અને નોલાન જેવા સુપરસ્ટાર દિગ્દર્શકોનું નામ હંમેશા અગ્રણી કલાકારો કરતા મોટું અથવા સમાન હોય છે. પરંતુ ભારતીય ફિલ્મ ઉદ્યોગમાં આવું બિલકુલ જોવા મળતું નથી.

વધુ કામ, ઓછો પગાર અને સુપરસ્ટાર્સનું દબાણ 

પોતાના ઓફિશિયલ ઇન્સ્ટાગ્રામ હેન્ડલની સ્ટોરીઝમાં રોષ ઠાલવતા 'ઇમર્જન્સી' ફેમ અભિનેત્રીએ સ્પષ્ટ શબ્દોમાં લખ્યું હતું કે, "આપણે આપણા ફિલ્મ નિર્માતાઓને ક્યારેય પૂરતું માન કે શ્રેય આપતા નથી. તેઓ વધુ પડતું કામ કરે છે, તેમને ઓછો પગાર મળે છે અને તેઓ સુપરસ્ટાર્સ દ્વારા ધમકાવવામાં આવે છે." તેણે વધુમાં ઉમેર્યું કે આ જ કારણસર આજકાલ કોઈ યુવાન ફિલ્મ નિર્માતા, ફોટોગ્રાફી ડિરેક્ટર કે ટેકનિશિયન બનવાનું સપનું જોતો નથી, કારણ કે દરેકને માત્ર અભિનેતા જ બનવું છે.

હીરો કરતાં વધુ ચમકી રહ્યા છે ડિરેક્ટર આદિત્ય ધર 

દિગ્દર્શક આદિત્ય ધરના કામના વખાણ કરતા કંગનાએ જણાવ્યું કે, "અહીં એક સુપરસ્ટાર ફિલ્મ નિર્માતા છે જે અત્યારે કોઈપણ હીરો કરતાં વધુ ચમકી રહ્યા છે. આજે, ઘણા યુવાનો તેમની વાર્તા જોઈ રહ્યા છે જેઓ તેમના જેવા બનવા અને ફિલ્મ ઉદ્યોગને વધુ ઊંચાઈએ લઈ જવાની ઇચ્છા રાખશે." નોંધનીય બાબત એ રહી કે, કંગનાએ પોતાની પોસ્ટમાં ફિલ્મના વખાણ કર્યા પરંતુ મુખ્ય અભિનેતા રણવીર સિંહ કે અન્ય કોઈ કલાકારનો ઉલ્લેખ કર્યો ન હતો.

દક્ષિણ ભારતીય સ્ટાર્સ દ્વારા પણ દિગ્દર્શકની પ્રશંસા 

કંગના રનૌત પહેલા પણ મનોરંજન જગતના અન્ય દિગ્ગજો આદિત્ય ધરના કામની નોંધ લઈ ચૂક્યા છે. સાઉથ ઇન્ડસ્ટ્રીના સુપરસ્ટાર અલ્લુ અર્જુન, વિજય દેવરકોંડા, મહેશ બાબુ, રામ ચરણ અને જુનિયર એનટીઆર જેવા કલાકારોએ પણ આદિત્ય ધરના શ્રેષ્ઠ સિનેમેટિક વિઝનની ખુલ્લા મને પ્રશંસા કરી હતી.