દિગ્દર્શક રોજીન થોમસની આગામી હોરર ફેન્ટેસી થ્રિલર ફિલ્મ 'કથનાર'નું શાનદાર ટ્રેલર મંગળવારે રિલીઝ કરવામાં આવ્યું છે. અભિનેતા જયસૂર્યા, પ્રભુ દેવા અને અનુષ્કા શેટ્ટી જેવા દિગ્ગજ કલાકારોથી સજ્જ આ ફિલ્મનું ટ્રેલર ચાહકો અને સિનેમા રસિકો માટે એક અદભૂત વિઝ્યુઅલ ટ્રીટ સમાન છે, જે વર્ષ 2026 માં વિશ્વભરમાં ધૂમ મચાવવા માટે તૈયાર છે.

2 મિનિટ અને 49 સેકન્ડના ટ્રેલરે ઉભી કરી ભારે ઉત્સુકતા 

2 મિનિટ અને 49 સેકન્ડના આ આકર્ષક ટ્રેલરમાં અદભૂત વિઝ્યુઅલ્સ, શાનદાર મ્યુઝિકલ સ્કોર અને ક્રિસ્ટલ ક્લિયર સાઉન્ડ ડિઝાઇન જોવા મળે છે. પ્રાચીન પૃષ્ઠભૂમિ પર આધારિત આ ફિલ્મમાં ફેન્ટેસીનું એક નવું મિશ્રણ જોવા મળી રહ્યું છે. હૃદયસ્પર્શી ફિલ્મ 'હોમ' થી લોકપ્રિય બનેલા દિગ્દર્શક રોજીન થોમસ અને સહ-લેખક આર. રામાનંદ દ્વારા આ ફિલ્મને એક ઐતિહાસિક મહાકાવ્ય સમાન બનાવવામાં આવી રહી છે. વિવેચકો અને ટ્રેડ નિષ્ણાતો પણ આ ટ્રેલર જોઈને મંત્રમુગ્ધ થઈ ગયા છે.

જયસૂર્યા જંગલી જાદુગર અને અનુષ્કા શેટ્ટી 'નીલા' ના પાત્રમાં 

આ પ્રોજેક્ટની પ્રથમ જાહેરાત 2023 માં કરવામાં આવી હતી. નિર્માતાઓએ ગયા વર્ષે ઓગસ્ટમાં જયસૂર્યાના જન્મદિવસ નિમિત્તે તેનો ભયાનક લુક જાહેર કર્યો હતો. આ ફિલ્મમાં જયસૂર્યા જંગલી જાદુગર 'કથનાર' ની મુખ્ય ભૂમિકા ભજવી રહ્યો છે, જ્યારે અનુષ્કા શેટ્ટી 'નીલા' ના પાત્રમાં જોવા મળશે. ફિલ્મની મુખ્ય ફોટોગ્રાફી પૂર્ણ થવા આવી છે અને પોસ્ટ-પ્રોડક્શન ટીમ 2026 માં તેને 15 જેટલી ભાષાઓમાં રિલીઝ કરવાની તૈયારી કરી રહી છે.

વર્ચ્યુઅલ પ્રોડક્શન: ભારતીય સિનેમામાં અગાઉ ક્યારેય ન વપરાયેલી ટેકનોલોજી 

આ ફિલ્મ સૌથી વધુ ચર્ચામાં છે કારણ કે તેમાં એવી અત્યાધુનિક ટેકનોલોજીનો ઉપયોગ થયો છે, જે ભારતીય સિનેમામાં અગાઉ ક્યારેય જોવા મળી નથી. ફિલ્મના લોન્ચિંગ સમયે નિર્માતાઓએ ઇન્સ્ટાગ્રામ પર એક પોસ્ટમાં જણાવ્યું હતું કે, "કથનાર એવી ટેકનોલોજી લાવે છે જેનો ભારતીય સિનેમામાં પહેલા ક્યારેય ઉપયોગ થયો નથી. Tech-Viz, Stunt-Viz અને Post-Viz જેવા અત્યાધુનિક વર્કફ્લો દ્વારા સહાયિત વર્ચ્યુઅલ પ્રોડક્શન ટેકનોલોજીનો ઉપયોગ કરતી આ ફિલ્મનું કામ શરૂ થઈ ગયું છે. 200 DSLR કેમેરા ફોટોગ્રામમેટ્રી રિગનો ઉપયોગ કરીને ફુલ બોડી 3D સ્કેન અને વિકોન આધારિત ઇન્ફ્રારેડ બાયપેડ મોશન કેપ્ચર જેવી પ્રક્રિયા શરૂ કરવામાં આવી છે."

નિર્માતાઓએ વધુમાં ઉમેર્યું હતું કે, હોલીવુડની ફિલ્મો 'જંગલ બુક' અને 'લાયન કિંગ' આ ટેકનોલોજીનો ઉપયોગ કરવામાં અગ્રેસર હતી. હવે, આંતરરાષ્ટ્રીય સિનેમામાં વપરાતી આ ટેકનોલોજીને 'કથનાર' દ્વારા મલયાલમ સિનેમામાં લાવવાની તક મળવા બદલ અમે આભારી છીએ. આ ફિલ્મ વૈશ્વિક સિનેમા બનશે જે આપણા દેશના ટેકનોક્રેટ્સને એકીકૃત કરશે.