આર્જેન્ટિનાના દિગ્ગજ ફૂટબોલર અને ઇન્ટર મિયામી ક્લબના કેપ્ટન લિયોનેલ મેસ્સીએ સત્તાવાર ફૂટબોલ મેચોમાં પોતાના 900 ગોલ પૂરા કરીને નવો ઈતિહાસ રચ્યો છે. ગઈકાલે ફ્લોરિડા ખાતે રમાયેલી કોનકાફે ચેમ્પિયન્સ કપની રોમાંચક મેચમાં ગોલ ફટકારીને તેણે આ ઐતિહાસિક સિદ્ધિ હાંસલ કરી છે. આ સાથે જ તે ક્રિસ્ટિયાનો રોનાલ્ડો બાદ આ જાદુઈ આંકડા સુધી પહોંચનાર વિશ્વનો માત્ર બીજો પુરુષ ફૂટબોલર બની ગયો છે.

ઇન્ટર મિયામી અને નેશવિલ એસસી વચ્ચેના મુકાબલામાં હાંસલ કરી સિદ્ધિ 

મેસ્સીએ ગઈકાલે ફ્લોરિડામાં કોનકાફે ચેમ્પિયન્સ કપના બીજા તબક્કામાં ઇન્ટર મિયામી સીએફ અને નેશવિલ એસસી વચ્ચે રમાયેલી મેચ દરમિયાન આ સીમાચિહ્ન પાર કર્યું હતું. અત્યંત સ્પર્ધાત્મક રહેલી આ મેચ 1-1 થી ડ્રોમાં પરિણમી હતી. જોકે, મેચ 1-1 થી બરાબરી પર રહેવા છતાં, મેસ્સીની ટીમ ઇન્ટર મિયામી એકંદરે ટુર્નામેન્ટના આગળના રાઉન્ડમાં પ્રવેશ મેળવવામાં સફળ રહી છે.

900 ગોલની ક્લબમાં માત્ર બે જ દિગ્ગજો: મેસ્સી અને રોનાલ્ડો 

પોતાના આ સીમાચિહ્નરૂપ પ્રહાર સાથે, મેસ્સીએ તેના હરીફ અને પોર્ટુગલના દિગ્ગજ ક્રિસ્ટિયાનો રોનાલ્ડો સાથે 900 ગોલ ક્લબમાં એક્સક્લુઝિવ સ્થાન મેળવ્યું છે. અલ-નાસર ક્લબના સુકાની રોનાલ્ડોએ સપ્ટેમ્બર 2024 માં આ ઐતિહાસિક સિદ્ધિ મેળવી હતી. નોંધનીય છે કે, રોનાલ્ડોના નામે હાલમાં 965 ગોલ નોંધાયેલા છે અને તેણે પોતાની નિવૃત્તિ પહેલા 1,000 ગોલનો ઐતિહાસિક આંકડો પાર કરવાનો લક્ષ્યાંક જાહેર કર્યો છે. જ્યારે ઓલ-ટાઇમ સ્કોરિંગ ચાર્ટમાં બ્રાઝિલના મહાન ફૂટબોલર પેલે 765 ગોલ સાથે ત્રીજા સ્થાને બિરાજમાન છે.

રોનાલ્ડો કરતા મેસ્સીની સફર રહી વધુ ઝડપી 

આંકડાકીય દ્રષ્ટિએ જોઈએ તો, મેસ્સીએ રોનાલ્ડો કરતા વધુ ઝડપથી આ લક્ષ્ય હાંસલ કર્યું છે. મેસ્સીને 900 ગોલના જાદુઈ આંકડા સુધી પહોંચવા માટે કુલ 1,142 મેચો રમવી પડી હતી, જ્યારે તેની સરખામણીમાં રોનાલ્ડોને આ સિદ્ધિ મેળવવા માટે 1,236 મેચોની જરૂર પડી હતી.