પ્રોફેશનલ ક્રિકેટમાં જ્યારે હરાજી અને મોટા કોન્ટ્રાક્ટ્સ રમતનું ભાવિ નક્કી કરતા હોય, ત્યારે એક જ ફ્રેન્ચાઇઝી સાથે વળગી રહેવું એ ખેલાડીની વફાદારી અને ટીમ મેનેજમેન્ટના તેના પરના વિશ્વાસનું પ્રતીક છે. ટીમ ન બદલવાનો નિર્ણય ખેલાડીને તે શહેર અને ચાહકો સાથે એક અતૂટ ભાવનાત્મક સંબંધમાં બાંધે છે. IPL ના ઇતિહાસમાં જ્યાં મોટા-મોટા દિગ્ગજોએ પણ ટીમો બદલી છે, ત્યાં આ મર્યાદિત ખેલાડીઓએ 'વન ટીમ મેન' બનીને આધુનિક ક્રિકેટમાં લોયલ્ટીના નવા આયામો સર કર્યા છે.

IPL ની 19મી સીઝન 28 માર્ચથી શરૂ થવા જઈ રહી છે. આ હાઈ-પ્રોફાઈલ લીગમાં રોહિત શર્મા અને એમએસ ધોની જેવા દિગ્ગજો પણ અલગ-અલગ ફ્રેન્ચાઇઝી તરફથી રમી ચૂક્યા છે, પરંતુ આ લિસ્ટમાં સામેલ ખેલાડીઓએ ક્યારેય પોતાની ટીમ બદલી નથી.

1. વિરાટ કોહલી (Royal Challengers Bengaluru)

વિરાટ કોહલી આ લિસ્ટમાં સૌથી ટોચ પર અને અજોડ સ્થાને છે. વર્ષ 2008 માં પ્રથમ સીઝનથી લઈને અત્યાર સુધીની તમામ 18 સીઝન વિરાટે માત્ર RCB માટે જ રમી છે. તે IPL ઇતિહાસનો એકમાત્ર ખેલાડી છે જેણે ક્યારેય હરાજીનો સામનો કર્યો નથી અને એક જ ફ્રેન્ચાઇઝી સાથે સતત જોડાયેલો રહ્યો છે.

2. સુનીલ નરેન (Kolkata Knight Riders)

વેસ્ટ ઈન્ડિઝના આ રહસ્યમય સ્પિનરે કોલકાતા નાઈટ રાઈડર્સ (KKR) ના ઇતિહાસમાં સુવર્ણ અક્ષરે નામ લખાવ્યું છે. નરેન અત્યાર સુધીમાં કુલ 14 સીઝનથી KKR પરિવારનો હિસ્સો રહ્યો છે. તેની વફાદારી અને ઓલરાઉન્ડ પ્રદર્શનને કારણે તે આ ટીમનો અભિન્ન અંગ બની ગયો છે.

3. કિરોન પોલાર્ડ (Mumbai Indians)

મુંબઈ ઇન્ડિયન્સના 'પાવર હાઉસ' ગણાતા કિરોન પોલાર્ડે વર્ષ 2010 માં ડેબ્યૂ કર્યું હતું. તેણે વર્ષ 2022 સુધી સતત 13 સીઝન મુંબઈ ઇન્ડિયન્સ માટે રમી છે. નિવૃત્તિ બાદ પણ તે આ ફ્રેન્ચાઇઝી સાથે કોચિંગ સ્ટાફમાં જોડાઈને પોતાની વફાદારી નિભાવી રહ્યો છે.

4. જસપ્રીત બુમરાહ (Mumbai Indians)

વિશ્વના સર્વશ્રેષ્ઠ બોલરોમાંના એક જસપ્રીત બુમરાહ પણ આ લિસ્ટનું ગૌરવ છે. વર્ષ 2013 માં મુંબઈ ઇન્ડિયન્સે તેને ટીમમાં સામેલ કર્યો હતો અને ત્યારથી લઈને અત્યાર સુધીની 13 સીઝનમાં તે આ જ ટીમ માટે રમ્યો છે. આગામી 14મી સીઝનમાં પણ તે મુંબઈના વાનખેડે સ્ટેડિયમમાં ધૂમ મચાવવા તૈયાર છે.

આ ખેલાડીઓએ સાબિત કર્યું છે કે રમતગમતમાં માત્ર આંકડા જ નહીં, પણ વફાદારી અને સમર્પણ પણ એટલા જ મહત્વના છે.