કેન્દ્ર સરકારે પ્રધાનમંત્રી ઉજ્જવલા યોજના અને અન્ય સામાન્ય ગેસ કનેક્શનધારકો માટે એલપીજી રિફિલ બુકિંગની સમયમર્યાદામાં ફેરફાર થયા હોવાના સમાચાર અને દાવાઓને સંપૂર્ણપણે ફગાવી દીધા છે. સરકારે સ્પષ્ટતા કરી છે કે બુકિંગના નિયમોમાં કોઈ જ નવો બદલાવ કરવામાં આવ્યો નથી અને અગાઉની સમયમર્યાદા રાબેતા મુજબ જ અમલમાં રહેશે.

સોશિયલ મીડિયા પર વાયરલ થયેલા ખોટા દાવાઓ 

છેલ્લા કેટલાક દિવસોથી વિવિધ સમાચાર અહેવાલો અને સોશિયલ મીડિયા પોસ્ટ્સમાં એવો દાવો કરવામાં આવી રહ્યો હતો કે, પ્રધાનમંત્રી ઉજ્જવલા યોજનાના કનેક્શન માટે હવે LPG રિફિલ બુકિંગની સમયમર્યાદા સુધારીને 45 દિવસ કરવામાં આવી છે. આ ભ્રામક પોસ્ટ્સમાં એવો પણ દાવો કરાયો હતો કે નોન-PMUY સિંગલ-બોટલ કનેક્શન ધરાવતા ગ્રાહકો માટે 25 દિવસ અને નોન-PMUY ડબલ-બોટલ કનેક્શન માટે 35 દિવસનો નવો નિયમ લાગુ કરવામાં આવ્યો છે.

પેટ્રોલિયમ મંત્રાલય દ્વારા સત્તાવાર સ્પષ્ટતા અને જૂના નિયમો યથાવત્ 

આ ભ્રામક અહેવાલોનું ખંડન કરતા પેટ્રોલિયમ અને કુદરતી ગેસ મંત્રાલયે સત્તાવાર નિવેદન જારી કર્યું છે. મંત્રાલયે સ્પષ્ટતા કરી છે કે સરકાર દ્વારા આવા કોઈપણ પ્રકારના ફેરફારો કરવામાં આવ્યા નથી. વિભાગના જણાવ્યા અનુસાર, હાલની રિફિલ બુકિંગ સમયમર્યાદા યથાવત રાખવામાં આવી છે. આ નિયમ મુજબ, ગ્રાહકના કનેક્શનનો પ્રકાર ગમે તે હોય, પરંતુ રિફિલ બુકિંગની સમયમર્યાદા શહેરી વિસ્તારો માટે 25 દિવસ અને ગ્રામીણ વિસ્તારો માટે 45 દિવસની જ રહેશે.

દેશમાં LPG નો પૂરતો સ્ટોક ઉપલબ્ધ, પેનિક બુકિંગ ટાળવા અપીલ 

અફવાઓને કારણે લોકોમાં ઊભી થયેલી ગેરસમજને દૂર કરતા સરકારે ભારપૂર્વક જણાવ્યું છે કે દેશમાં હાલ LPG નો પૂરતો અને સુરક્ષિત સ્ટોક ઉપલબ્ધ છે, તેથી ચિંતા કરવાનું કોઈ જ કારણ નથી. સરકારે નાગરિકોને ખાસ સલાહ આપી છે કે તેઓ આવી પાયાવિહોણી ખોટી માહિતી પર વિશ્વાસ ન કરે કે તેને ફોરવર્ડ કરીને અન્ય લોકોમાં ફેલાવે નહીં. આ ઉપરાંત, ખોટા ડરના કારણે ગ્રાહકોને બિનજરૂરી અથવા ગભરાટ ભર્યા (પેનિક) બુકિંગ ટાળવા માટે પણ કડક અનુરોધ કરવામાં આવ્યો છે.