સાઉથ સિનેમાના પ્રખ્યાત નિર્દેશક એસ.એસ. રાજામૌલી અને સુપરસ્ટાર મહેશ બાબુની આગામી ફિલ્મ ‘વારાણસી’ની ચર્ચા લાંબા સમયથી ચાલી રહી છે. પરંતુ હવે એક મોટી અપડેટ સામે આવી છે. ફિલ્મનું ટાઈટલ ‘વારાણસી’ હોવા છતાં તેની શૂટિંગ બનારસમાં નહીં, પરંતુ હૈદરાબાદમાં જ થવાની છે.

ફિલ્મ નિર્માતાઓએ વારાણસી શહેરનો હુબહુ સેટ હૈદરાબાદમાં જ તૈયાર કર્યો છે. આ સેટ એટલો વાસ્તવિક અને વિશાળ છે કે તે વારાણસીના પ્રસિદ્ધ મંદિરો, ઘાટો અને આલીશાન મહેલોને એકદમ મેચ કરે છે. પ્રોડક્શન ટીમે શહેરની અસલ તસવીરોને આધારે દરેક નાની-મોટી વિગતને ખૂબ જ સાચવીને બનાવી છે.

વારાણસીનો હુબહુ સેટ હૈદરાબાદમાં  
રાજામૌલી અને તેમની ટીમે ફિલ્મને વાસ્તવિકતાની નજીક લાવવા માટે કોઈ કસર છોડી નથી. વારાણસીના ઘાટો, મંદિરો, ગલીઓ અને પરંપરાગત વાતાવરણને હૈદરાબાદના સ્ટુડિયોમાં જ પુનઃસર્જન કરવામાં આવ્યું છે. આ માટે ટીમે દિવસ-રાત મહેનત કરી છે. આ સેટ જોઈને દર્શકોને ખરેખર લાગશે કે તેઓ વારાણસીમાં જ છે.

ફિલ્મમાં મહેશ બાબુ ‘રુદ્ર’ના રૂપમાં, પૃથ્વીરાજ સુકુમારન ‘કુંભ’ના અવતારમાં અને પ્રિયંકા ચોપરા જોનસ ‘મંદાકિની’ના રૂપમાં જોવા મળશે. આ ત્રણેયના લુક્સ ઇન્ટરનેટ પર ખૂબ વાયરલ થયા હતા અને ફેન્સમાં ભારે ઉત્સાહ જોવા મળી રહ્યો છે.

ફિલ્મ ક્યારે રિલીઝ થશે? 
‘વારાણસી’ એક લાર્જ સ્કેલની ફિલ્મ છે. આ ફિલ્મ ૭ એપ્રિલ ૨૦૨૭ના રોજ વિશ્વભરના સિનેમાઘરોમાં રિલીઝ થવાની છે. ફિલ્મના ટાઈટલ લોન્ચિંગનો કાર્યક્રમ પણ ભવ્ય રીતે યોજાયો હતો. નિર્માતાઓ આ ફિલ્મને એક બ્લોકબસ્ટર બનાવવા માટે પૂર્ણ પ્રયાસ કરી રહ્યા છે.

રાજામૌલીના નિર્દેશનમાં બનેલી આ ફિલ્મમાં હોરર, એક્શન, ડ્રામા અને ઇમોશનલ તત્વોનું અનોખું મિશ્રણ જોવા મળશે. મહેશ બાબુ અને પ્રિયંકા ચોપરાની જોડી પહેલી વખત સ્ક્રીન પર જોવા મળશે, જેના કારણે ફેન્સમાં અત્યારથી જ ભારે ક્રેઝ છે. આ ફિલ્મ દ્વારા રાજામૌલી ફરી એક વાર સિનેમાના પ્રેક્ષકોને એક અદ્ભુત અને વિઝ્યુઅલી સ્ટનિંગ અનુભવ આપવા માટે તૈયાર છે.