ભારતીય સિનેમાના દિગ્ગજ દિગ્દર્શક મણિરત્નમે તેમની આગામી ફિલ્મની સત્તાવાર ઘોષણા કરી દીધી છે, જેની સાથે જ સંગીતપ્રેમીઓ માટે મોટા સમાચાર આવ્યા છે. આ ફિલ્મમાં ઓસ્કાર વિજેતા સંગીતકાર એ.આર. રહેમાન પોતાની ધૂન પર દર્શકોને મંત્રમુગ્ધ કરશે. અગાઉ એવી ચર્ચા હતી કે આ પ્રોજેક્ટમાં સાઈ અભ્યંકર સંગીત આપશે, પરંતુ હવે એ.આર. રહેમાનના નામ પર મહોર વાગી જતાં ચાહકોમાં ભારે ઉત્તેજના જોવા મળી રહી છે. મણિરત્નમ અને એ.આર. રહેમાનની જોડીનો ઈતિહાસ અત્યંત સફળ રહ્યો છે.

શાહરૂખ ખાનની 'દિલ સે' થી લઈને ઐશ્વર્યા રાયની 'પોન્યિયિન સેલ્વન' સુધી, આ જોડીએ ભારતીય સિનેમાને અનેક યાદગાર અને બ્લોકબસ્ટર ગીતો આપ્યા છે. રહેમાનના સંગીત અને મણિરત્નમના વિઝનનો સમન્વય હંમેશા દર્શકો માટે એક વિઝ્યુઅલ અને મ્યુઝિકલ ટ્રીટ સાબિત થાય છે. આ ફિલ્મમાં અભિનયના બે પાવરહાઉસ ગણાતા કલાકારો, સાઈ પલ્લવી અને વિજય સેતુપતિ મુખ્ય ભૂમિકામાં જોવા મળશે. સાઈ પલ્લવીની નેચરલ એક્ટિંગ અને વિજય સેતુપતિની દમદાર હાજરી આ ફિલ્મને વધુ ખાસ બનાવશે.

મણિરત્નમ અને વિજય સેતુપતિની આ બીજી ફિલ્મ હશે, જે જોવું પ્રેક્ષકો માટે રસપ્રદ રહેશે. મણિરત્નમની આ નવી ફિલ્મ અંગેની સત્તાવાર જાણકારી તેમની પ્રોડક્શન કંપની 'મદ્રાસ ટોકીઝ'ના અધિકૃત ઇન્સ્ટાગ્રામ પેજ પર શેર કરવામાં આવી છે. સોશિયલ મીડિયા પર આ જાહેરાત થતાની સાથે જ સિનેમા જગતમાં હલચલ મચી ગઈ છે. ફિલ્મનું શીર્ષક હજુ ગુપ્ત રાખવામાં આવ્યું છે, પરંતુ તેની સ્ટારકાસ્ટ અને મ્યુઝિક ટીમે અત્યારથી જ હાઈપ ઉભી કરી દીધી છે.

લાંબા સમયથી મણિરત્નમના આગામી પ્રોજેક્ટની રાહ જોતા ચાહકો માટે આ ફિલ્મ એક મોટું સરપ્રાઈઝ છે. સાઉથ અને નોર્થ બંને સિનેમામાં મણિરત્નમનો ક્રેઝ હોવાથી આ ફિલ્મને પેન-ઈન્ડિયા લેવલ પર ભવ્ય રીતે રિલીઝ કરવાની તૈયારીઓ ચાલી રહી છે. ટૂંક સમયમાં ફિલ્મના શૂટિંગ શિડ્યુલ અને અન્ય કલાકારોની વિગતો જાહેર કરવામાં આવશે.