ભારતના વિદેશ મંત્રાલયના ફેક્ટ ચેક યુનિટે સોશિયલ મીડિયા પર વાયરલ થઈ રહેલા એક ગંભીર અને ભ્રામક દાવાનું સખત શબ્દોમાં ખંડન કર્યું છે. જેમાં એવો દાવો કરવામાં આવ્યો હતો કે અમેરિકાએ ઈરાન પર બોમ્બમારો કરવા માટે પશ્ચિમ ભારતમાંથી લશ્કરી સહાય અને સંપત્તિનો ઉપયોગ કરવા માટે ભારત સરકાર પાસે મંજૂરી માંગી છે. મંત્રાલયે આ અહેવાલોને સંપૂર્ણપણે ખોટા અને ઉપજાવી કાઢેલા ગણાવ્યા છે.

સોશિયલ મીડિયા પર વાયરલ થયેલા દાવાની વાસ્તવિકતા 

છેલ્લા કેટલાક સમયથી વિવિધ સોશિયલ મીડિયા પ્લેટફોર્મ્સ પર એવી અફવાઓ અને પોસ્ટ્સ ઝડપથી વાયરલ થઈ રહી હતી કે, અમેરિકા ઈરાન પર લશ્કરી કાર્યવાહી કરવાની તૈયારી કરી રહ્યું છે અને આ માટે તેણે પશ્ચિમ ભારતના લશ્કરી મથકો અથવા સંપત્તિઓનો ઉપયોગ કરવા ભારતનો ટેકો માંગ્યો છે. આંતરરાષ્ટ્રીય સ્તરે મધ્ય પૂર્વમાં ચાલી રહેલા તણાવ વચ્ચે આવા દાવાને કારણે અનેક પ્રકારની ભ્રામક અટકળો ઊભી થઈ હતી. આ ગંભીર બાબતને ધ્યાનમાં રાખીને વિદેશ મંત્રાલયે તાત્કાલિક ધોરણે સત્તાવાર સ્પષ્ટતા કરી છે.

ખોટી અને ભ્રામક પોસ્ટ્સથી સાવધ રહેવા નાગરિકોને અપીલ 

વિદેશ મંત્રાલયના સત્તાવાર ફેક્ટ ચેક યુનિટે આ દાવાઓને સંપૂર્ણપણે પાયાવિહોણા અને સત્યથી વેગળા ગણાવ્યા છે. મંત્રાલયે સ્પષ્ટ કર્યું છે કે અમેરિકા દ્વારા ભારત પાસે આવી કોઈ જ માંગણી કરવામાં આવી નથી અને બંને દેશો વચ્ચે આ પ્રકારના કોઈ લશ્કરી ઉપયોગ અંગે કોઈ ચર્ચા થઈ નથી. સાથે જ, મંત્રાલયે દેશના નાગરિકોને ખાસ અપીલ કરી છે કે તેઓ સોશિયલ મીડિયા પર ફરતી આવી કોઈપણ અફવાઓ, ભ્રામક દાવાઓ કે ખોટી પોસ્ટ્સ પર વિશ્વાસ ન કરે અને તેને આગળ શેર કરવાથી બચે.

રાષ્ટ્રીય સુરક્ષા અને વિદેશ નીતિ જેવા સંવેદનશીલ આંતરરાષ્ટ્રીય મુદ્દાઓ પર ખોટી માહિતી ફેલાવવી દેશ માટે નુકસાનકારક સાબિત થઈ શકે છે. આગામી સમયમાં સાયબર સુરક્ષા એજન્સીઓ દ્વારા આવી ભ્રામક અને અફવા ફેલાવનારી પોસ્ટ્સનું મૂળ શોધવા અને તેને અટકાવવા માટે ચાંપતી નજર રાખવામાં આવશે.