નવી દિલ્હીના અરુણ જેટલી સ્ટેડિયમ ખાતે શનિવારે રમાયેલી IPL 2026 ની રોમાંચક મેચમાં મુંબઈ ઈન્ડિયન્સે દિલ્હી કેપિટલ્સ સામે 20 ઓવરમાં 6 વિકેટે 162 રનનો સ્પર્ધાત્મક સ્કોર નોંધાવ્યો છે. ધીમી અને કાળી માટીવાળી પિચ પર કાર્યકારી કેપ્ટન સૂર્યકુમાર યાદવે 51 રનની કેપ્ટન ઇનિંગ રમીને ટીમને સન્માનજનક સ્કોર સુધી પહોંચાડવામાં સિંહફાળો આપ્યો હતો.

સૂર્યકુમાર અને રોહિત શર્માએ ઇનિંગને સ્થિર કરી 

મુંબઈ ઈન્ડિયન્સની શરૂઆત થોડી ધીમી રહી હતી અને ટીમ બેટિંગમાં ક્યારેય સંપૂર્ણ લય પકડી શકી નહોતી. જોકે, સૂર્યકુમાર યાદવ અને પૂર્વ કેપ્ટન રોહિત શર્મા (35 રન) વચ્ચે 53 રનની મહત્વપૂર્ણ ભાગીદારી નોંધાઈ હતી, જેણે દાવને સંભાળી લીધો હતો. સૂર્યકુમારે 36 બોલનો સામનો કરી 3 ચોગ્ગા અને 2 છગ્ગાની મદદથી માપેલી 51 રનની ઇનિંગ રમી હતી, જે મુંબઈના સ્કોરનો મુખ્ય આધાર બની હતી.

મુકેશ કુમારની ઘાતક બોલિંગથી મુંબઈને ફટકો 

દિલ્હી કેપિટલ્સના બોલરોએ સમયાંતરે વિકેટો ઝડપીને મુંબઈને મોટા સ્કોર તરફ જતા રોક્યું હતું. ખાસ કરીને મુકેશ કુમાર સૌથી સફળ બોલર રહ્યો હતો. તેણે પોતાની બીજી ઓવરમાં ચુસ્ત લાઇન અને ગુડ લેન્થનો ઉપયોગ કરીને રાયન રિકલ્ટન અને તિલક વર્માને સસ્તામાં આઉટ કરી મુંબઈને બેવડો ઝટકો આપ્યો હતો. મુકેશે 26 રન આપીને 2 વિકેટ ઝડપી હતી. જ્યારે અક્ષર પટેલે પણ 22 રન આપી રોહિત શર્માની 1 મહત્વની વિકેટ લીધી હતી.

અંતિમ ઓવરોમાં સંઘર્ષ અને દિલ્હીની વાપસી 

પાવર પ્લે બાદ રોહિત અને સૂર્યકુમારે આક્રમક છગ્ગા ફટકાર્યા હતા. શેરફેન રધરફોર્ડ જલ્દી આઉટ થવા છતાં સૂર્યકુમારે નમન ધીર સાથે મળીને સ્કોર બોર્ડ ફરતું રાખ્યું હતું અને 15 મી ઓવરમાં કુલદીપ યાદવની ઓવરમાં 17 રન લીધા હતા. જોકે, દિલ્હીના લુંગી એન્ગીડી અને ટી. નટરાજન જેવા બોલરોએ ફરી વાપસી કરાવી હતી. સૂર્યકુમાર એન્ગીડીના બોલ પર LBW આઉટ થયો હતો, જ્યારે નમન ધીર નટરાજનનો શિકાર બન્યો હતો.

છેલ્લી 4 ઓવરમાં મુંબઈએ 38 રન બનાવ્યા હતા. મિશેલ સેન્ટનર અને કોર્બિન બોશે અંતમાં 2-2 ચોગ્ગા ફટકારી ટીમને 160 નો આંકડો પાર કરાવ્યો હતો.

163 રનના લક્ષ્યાંકનો પીછો કરવા ઉતરનારી દિલ્હી કેપિટલ્સ માટે આ ધીમી પિચ પર બેટિંગ કરવી પડકારજનક સાબિત થઈ શકે છે, જેના કારણે મેચનો બીજો ભાગ એટલે કે રન ચેઝ અત્યંત રોમાંચક બની રહેશે.