બોલિવૂડના જાણીતા ફિલ્મ નિર્માતા અને દિગ્દર્શક મોહિત સૂરીના જન્મદિવસ નિમિત્તે અભિનેત્રી અનીત પડ્ડાએ સોશિયલ મીડિયા પર એક ખાસ અને ભાવનાત્મક નોંધ શેર કરી છે. 'સૈયારા' ફિલ્મની અભિનેત્રીએ મોહિત સૂરીને પ્રેમથી 'મોમો' કહીને સંબોધ્યા હતા અને તેમના વ્યક્તિત્વના ખુલ્લા મને વખાણ કર્યા હતા.

ઇન્સ્ટાગ્રામ પર શેર કર્યો મજેદાર પ્રૅન્ક વીડિયો

અનીત પડ્ડાએ પોતાના ઇન્સ્ટાગ્રામ એકાઉન્ટ પર મોહિત સૂરી સાથેનો એક વીડિયો શેર કર્યો છે. આ ક્લિપમાં અભિનેત્રી ફિલ્મ નિર્માતા સાથે પ્રૅન્ક કરવાનો પ્રયાસ કરતી જોવા મળે છે, પરંતુ તે નિષ્ફળ જાય છે. વીડિયોમાં મોહિત સૂરી રમૂજી અંદાજમાં કહેતા સંભળાય છે કે, મારે બાળકો છે અને હું દરરોજ આ બધું કરું છું.

અનીતની ભાવનાત્મક પોસ્ટ: "તમે એક કીમિયાગર છો"

વીડિયોના કેપ્શનમાં અનીતે અત્યંત સુંદર શબ્દોમાં મોહિત સૂરીની પ્રશંસા કરી છે. તેણે લખ્યું છે કે, "તમે એક અલ્કેમિસ્ટ (કીમિયાગર) જેવા છો, જે લોકો ચૂકી જાય છે તેવી વસ્તુઓ, શાંત પીડા અને આંખોમાં છુપાયેલા પ્રેમને પકડીને તેને એવી વસ્તુમાં ફેરવી દો છો જે આપણે બધા અનુભવી શકીએ. તમે મને હૃદયથી અનુભવવાની હિંમત આપી છે અને જીવવાની એક સુંદર રીત બતાવી છે. તમે મારા માટે સૌથી માનવીય વ્યક્તિ છો. હેપ્પી બર્થડે મારા મોમો."

બ્લોકબસ્ટર ફિલ્મ 'સૈયારા' માં સાથે કર્યું હતું કામ

ઉલ્લેખનીય છે કે, મોહિત સૂરીએ અનીત પડ્ડા અને અહાન પાંડે અભિનીત મ્યુઝિકલ ડ્રામા ફિલ્મ 'સૈયારા' નું સફળ નિર્દેશન કર્યું હતું. આ ફિલ્મ વર્ષ 2025 ની ત્રીજી સૌથી વધુ કમાણી કરનારી હિન્દી ફિલ્મ અને અત્યાર સુધીની સૌથી વધુ કમાણી કરનારી ભારતીય રોમેન્ટિક ફિલ્મ બની હતી. 'સૈયારા' બે પ્રેમીઓની ઉથલપાથલભરી સફર અને ઉતાર-ચઢાવ વચ્ચેના રોમાંસની વાર્તા દર્શાવે છે.

આસિસ્ટન્ટ ડાયરેક્ટરથી લઈને સફળ દિગ્દર્શક સુધીની સફર

મોહિત સૂરીએ વિક્રમ ભટ્ટની ફિલ્મ 'કસૂર' માં આસિસ્ટન્ટ ડાયરેક્ટર તરીકે પોતાની કારકિર્દીની શરૂઆત કરી હતી. ત્યારબાદ તેમણે વર્ષ 2005 માં 'ઝહેર' ફિલ્મથી દિગ્દર્શક તરીકે ડેબ્યૂ કર્યું હતું. અત્યાર સુધીની સફરમાં તેમણે બોલિવૂડને 'મર્ડર 2', 'આવારપન', 'એક વિલન', 'મલંગ' અને સુપરહિટ 'આશિકી 2' જેવી યાદગાર ફિલ્મો આપી છે.