નાસાના આર્ટેમિસ II મિશને અંતરિક્ષ વિજ્ઞાનના ક્ષેત્રમાં એક નવો સુવર્ણ અધ્યાય લખ્યો છે. ઓરિઅન અવકાશયાનમાં ચંદ્રની સફરે ગયેલા ક્રૂ સભ્યોએ પૃથ્વીની પરિક્રમા કરી રહેલા આંતરરાષ્ટ્રીય અવકાશ મથક સાથે સીધો સંવાદ સાધીને અદ્ભુત ઈતિહાસ રચ્યો છે. આ ઉપરાંત, આ મિશને પૃથ્વીથી અત્યાર સુધીના સૌથી વધુ અંતરનો માનવીય રેકોર્ડ પણ વટાવી દીધો છે, જે અવકાશ સંશોધન ક્ષેત્રે ભારત સહિત સમગ્ર વિશ્વ માટે એક મોટી સિદ્ધિ ગણાય છે.

ચંદ્રની સફર અને સ્પેસ સ્ટેશન વચ્ચે ઐતિહાસિક સંવાદ

માનવ ચંદ્ર મિશનના ઈતિહાસમાં આ પ્રથમ વખત બન્યું છે કે ચંદ્રની અત્યંત નજીક મુસાફરી કરી રહેલા અવકાશયાત્રીઓએ પૃથ્વીની ભ્રમણકક્ષામાં રહેલા અવકાશયાનમાં સવાર સાથીઓ સાથે સીધો સંપર્ક કર્યો હોય. આર્ટેમિસ II પર સવાર ક્રિસ્ટીના કોચે સ્પેસ સ્ટેશન પર રહેલી જેસિકા મીર સાથે વાત કરી હતી. નોંધનીય છે કે આ બંને મહિલાઓએ અગાઉ વર્ષ 2019 માં પ્રથમ સંપૂર્ણ મહિલા સ્પેસવોક કરીને વિશ્વ વિક્રમ બનાવ્યો હતો. નાસાના મિશન કંટ્રોલે ચાર આર્ટેમિસ II અવકાશયાત્રીઓ અને અવકાશ મથક પરના ચાર ક્રૂ સભ્યો વચ્ચે આ ખાસ વાતચીત ગોઠવવામાં મહત્વની ભૂમિકા ભજવી હતી.

એપોલો 13 ના 56 વર્ષ જૂના રેકોર્ડને મિશને વટાવ્યો

આર્ટેમિસ II એ પૃથ્વીથી માનવજાતે કરેલી સૌથી દૂરની મુસાફરીનો નવો રેકોર્ડ સ્થાપિત કર્યો છે. ઓરિઅન અવકાશયાન ચંદ્રની દૂરની બાજુએ ઉડાન ભરતી વખતે પૃથ્વીથી આશરે 2,52,752 માઇલના અંતરે પહોંચ્યું હતું. આ સિદ્ધિએ વર્ષ 1970 માં એપોલો 13 મિશન દ્વારા સ્થાપિત 2,48,655 માઇલના રેકોર્ડને પણ પાછળ છોડી દીધો છે. એપોલો 17 પછી આ પહેલું મિશન છે જેમાં માનવીએ પૃથ્વીથી આટલા લાંબા અંતરની સફર કરી છે.

ચંદ્રની પાછળ ડૂબતી પૃથ્વીની મનમોહક તસવીર

પૃથ્વી પર પાછા ફરતી વખતે મિશનના કમાન્ડર રીડ વાઈઝમેને ચંદ્ર પરથી કેટલીક અદભુત તસવીરો શેર કરી છે. આ પૈકીની એક છબીમાં ચંદ્રની ક્ષિતિજ પાછળ પૃથ્વી ડૂબતી દેખાય છે, જે એપોલો 8 દરમિયાન લેવામાં આવેલા પ્રખ્યાત ‘અર્થરાઇઝ’ ફોટા જેવી જ ભવ્ય લાગે છે. આ તસવીરો માનવજાત માટે ભાવિ અંતરિક્ષ મિશનની નવી આશા જગાવનારી છે.

11 એપ્રિલે સાન ડિએગો નજીક સમુદ્રમાં લેન્ડિંગ

અંતરિક્ષમાં લગભગ 10 દિવસનો સમય વિતાવ્યા બાદ હવે આ મિશન સફળતાપૂર્વક પૃથ્વી તરફ પરત ફરી રહ્યું છે. નિર્ધારિત કાર્યક્રમ મુજબ, 11 એપ્રિલ 2026 ના રોજ શનિવારે સવારે 5:37 વાગ્યે સાન ડિએગો અમેરિકા નજીક સમુદ્રમાં ઓરિઅન કેપ્સ્યુલનું સ્પ્લેશડાઉન એટલે કે સમુદ્રમાં ઉતરાણ થશે. નાસા અને રિકવરી ટીમો દ્વારા અવકાશયાત્રીઓને સલામત રીતે બહાર કાઢવાની તૈયારીઓ પૂર્ણ કરી દેવામાં આવી છે.

આર્ટેમિસ II ની સફળતા ભવિષ્યના મિશન માટે પાયા પથ્થર સાબિત થશે. નાસાના આયોજન મુજબ, વર્ષ 2027 માં આર્ટેમિસ III ચંદ્ર પર ઉતરાણ પ્રણાલીનું પરીક્ષણ કરશે, જ્યારે વર્ષ 2028 માં આર્ટેમિસ IV મિશન દ્વારા ચંદ્રના દક્ષિણ ધ્રુવ પર અવકાશયાત્રીઓને ઉતારવાનું લક્ષ્ય રાખવામાં આવ્યું છે.