અમદાવાદના નારણપુરા સ્થિત અત્યાધુનિક વીર સાવરકર સ્પોર્ટ્સ કોમ્પલેક્ષ ખાતે આગામી 28 અને 29 માર્ચના રોજ રાષ્ટ્રીય સ્તરની બે મોટી ચેસ ટુર્નામેન્ટનું ભવ્ય આયોજન કરવામાં આવ્યું છે. ચિલ્ડ્રન્સ રિસર્ચ યુનિવર્સિટી અને ગુજરાત કાઉન્સિલ ઓન સાયન્સ એન્ડ ટેક્નોલોજીના સંયુક્ત ઉપક્રમે યોજાનારા આ શતરંજ મહોત્સવમાં દેશભરના 24 રાજ્યોમાંથી 1935 જેટલા ખેલાડીઓ ભાગ લેવા જઈ રહ્યા છે.

બે દિવસીય ટુર્નામેન્ટનું માળખું અને આયોજન 

આ બે દિવસીય સ્પર્ધાના આયોજન અંગે વિગતો આપતા સંયોજક ડૉ. મહેન્દ્ર પટેલે જણાવ્યું હતું કે, 28 માર્ચ 2026ના રોજ ‘ઓલ ઈન્ડિયા ઓપન ફિડે રેટેડ રેપિડ અંડર-18 ચેસ ટુર્નામેન્ટ’ રમાશે. જ્યારે 29 માર્ચ 2026ના રોજ ‘ઓલ ઈન્ડિયા ઓપન ફિડે રેટેડ રેપિડ ચેસ ટુર્નામેન્ટ’ યોજાશે. આ રાષ્ટ્રીય કક્ષાની સ્પર્ધાને ઓલ ઈન્ડિયા ચેસ ફેડરેશન, ગુજરાત સ્ટેટ ચેસ એસોસિયેશન, ડિપાર્ટમેન્ટ ઓફ સાયન્સ એન્ડ ટેક્નોલોજી, સ્પોર્ટ્સ ઓથોરિટી ઓફ ગુજરાત અને વિવિધ સહકારી બેંકોનો વ્યાપક સહયોગ સાંપડ્યો છે.

કુલ 11 લાખની ઈનામી રાશિ અને 1935 સ્પર્ધકો વચ્ચે મુકાબલો 

દેશભરમાંથી મળેલા પ્રચંડ પ્રતિસાદને પગલે આ ટુર્નામેન્ટમાં ઇન્ટરનેશનલ માસ્ટર્સ અને ફિડે માસ્ટર્સ સહિત કુલ 1935 ખેલાડીઓ ભાગ લેશે. અંડર-18 કેટેગરીમાં 967 ખેલાડીઓ વચ્ચે સ્પર્ધા થશે, જેમાં 133 વિજેતાઓને કુલ 4 લાખ રૂપિયાની ઈનામી રાશિ અપાશે. બીજી તરફ, ઓપન રેપિડ કેટેગરીમાં 968 ખેલાડીઓ પોતાના કસબનું પ્રદર્શન કરશે, જેમાં 115 વિજેતાઓને કુલ 7 લાખ રૂપિયાના રોકડ પુરસ્કારોથી સન્માનિત કરવામાં આવશે.

દિવ્યાંગ, વરિષ્ઠ અને બાળ ખેલાડીઓ માટે વિશેષ પ્રોત્સાહન 

આ ટુર્નામેન્ટની સૌથી મોટી વિશેષતા એ છે કે તેમાં માત્ર યુવાનો જ નહીં, પરંતુ તમામ વયજૂથના ખેલાડીઓને સાંકળી લેવામાં આવ્યા છે. દિવ્યાંગ સ્પર્ધકો તેમજ 50, 60 અને 65 વર્ષથી ઉપરના વરિષ્ઠ ખેલાડીઓ માટે ખાસ ઈનામોની વ્યવસ્થા કરવામાં આવી છે. આ ઉપરાંત 7 થી 15 વર્ષના બાળકો માટે પણ અલગ વયજૂથના ઈનામો નક્કી કરાયા છે.

દરેક સ્પર્ધકને મળશે ઇન્ટરનેશનલ ચેસ કિટ 

આયોજકો દ્વારા રમતને પ્રોત્સાહન આપવાના ભાગરૂપે, ટુર્નામેન્ટમાં ભાગ લેનાર પ્રત્યેક ખેલાડીને ઇન્ટરનેશનલ ચેસ કિટ અને ઈ-સર્ટિફિકેટ એનાયત કરવામાં આવશે. અમદાવાદમાં યોજાનારો શતરંજનો આ મહોત્સવ બૌદ્ધિક રમત પ્રેમીઓ માટે એક સુવર્ણ તક બની રહેશે. આ રાષ્ટ્રીય મહાસંગ્રામથી ગુજરાતના સ્થાનિક યુવા ખેલાડીઓને આંતરરાષ્ટ્રીય સ્તરના ખેલાડીઓ સાથે સ્પર્ધા કરવાનો અને તેમની પાસેથી નવું શીખવાનો અમૂલ્ય અનુભવ પ્રાપ્ત થશે.