આજે 27 માર્ચે સમગ્ર દેશમાં ભગવાન શ્રીરામના જન્મોત્સવની ધામધૂમ છે. આ પવિત્ર અવસરે બિઝનેસવુમન નીતા અંબાણીએ ખાસ લુકથી સૌનું ધ્યાન ખેંચી લીધું છે. ઓડિશાની KIIT યુનિવર્સિટીમાંથી માનદ ડોક્ટરેટની ડિગ્રી લેવા પહોંચેલી નીતા અંબાણીએ ‘રામ નામ’ લખેલી એક અનોખી સાડી પહેરી હતી. આ સાડી માત્ર તેમના લુકને જ નહીં, પરંતુ તેમની ભગવાન રામ પ્રત્યેની ઊંડી શ્રદ્ધા અને આસ્થાને પણ સ્પષ્ટપણે દર્શાવી રહી હતી.

રામ નામથી સજ્જ અનોખી સાડી
નીતા અંબાણીએ સ્વદેશી બ્રાન્ડની બ્રાઉન (માટી જેવા) રંગની કસ્ટમાઈઝ્ડ ‘બંધા ઇકત’ સાડી પહેરી હતી. આ સાડીની સૌથી વિશેષ વાત એ છે કે તેના પર ‘રામ’ નામ અનેક ભાષાઓમાં લખેલું છે. સાડીના પલ્લુ પર ઓડિયા લિપિમાં પવિત્ર મંત્રો પણ બુનાવટથી સજાવવામાં આવ્યા છે.

2 વર્ષની મહેનત
આ અદ્ભુત સાડીને તૈયાર થવામાં પૂરા ૨ વર્ષનો સમય લાગ્યો છે. તેને માસ્ટર આર્ટિસ્ટ શ્રી હરિશંકર મેહરે પોતાના હાથથી અત્યંત બારીકાઈ અને મહેનતથી બનાવી છે. આ સાડી પરંપરાગત ‘બંધા’ ટેકનિકથી તૈયાર કરવામાં આવી છે અને તેમાં સંપૂર્ણપણે કુદરતી રંગોનો ઉપયોગ કરવામાં આવ્યો છે. સાડીના ડિઝાઈનમાં ‘રામ શિલા’થી પ્રેરિત મોઝેઇક પેટર્ન છે, જે તેને અત્યંત આકર્ષક અને આધ્યાત્મિક બનાવે છે.

લુકને પૂર્ણ કરતા એક્સેસરીઝ
નીતા અંબાણીએ આ ખાસ સાડી સાથે ડાયમંડ જ્વેલરીની જગ્યાએ લાંબો અને પરંપરાગત બીડેડ નેકલેસ પહેર્યો હતો. તેમણે ફ્લોરલ ડિઝાઈનવાળા ઇયરિંગ્સ, મોટા સ્ટોનવાળી રિંગ અને ગોલ્ડ બેંગલ્સ પહેર્યા હતા. મેકઅપ નેચરલ અને હળવું રાખ્યું હતું, જેમાં ન્યુડ લિપસ્ટિક અને માથે બિંદીએ તેમના લુકને વધુ નિખાર્યો હતો. વાળને લો બન બનાવીને તેમાં ફૂલ લગાવીને તેમણે સંપૂર્ણ પરંપરાગત ટચ આપ્યો હતો.

રામનવમીના આ પવિત્ર દિવસે નીતા અંબાણીની આ સાડી માત્ર ફેશન નહીં, પરંતુ ભક્તિ, આસ્થા અને સંસ્કૃતિનું સુંદર પ્રતીક બની રહી છે. સોશિયલ મીડિયા પર તેમની આ તસવીરો ખૂબ વાયરલ થઈ રહી છે અને લોકો તેમની સાદગી અને પરંપરા પ્રત્યેના જોડાણની ખૂબ તારીફ કરી રહ્યા છે.