પાટણ શહેરમાં એક ચોંકાવનારી ઘટના સામે આવી છે, જ્યાં બાળકોના ભવિષ્ય માટે દેવું ન કરવા અને પૈસા બચાવી મકાન બનાવવાની શિખામણ આપનાર પત્ની પર પતિએ અત્યાચાર ગુજાર્યો છે. સાસુ-સસરાની મદદથી પતિએ પત્નીને ઢોર માર મારી, દાતરડાથી હુમલો કરી ઘરમાં પૂરી દીધી હતી. હાલ આ મામલે પીડિતાએ પોલીસમાં ફરિયાદ નોંધાવતા પોલીસે કાયદેસરની કાર્યવાહી હાથ ધરી છે.

બચત કરી મકાન બનાવવાની સલાહ પતિને ન ગમી 

પ્રાપ્ત વિગતો અનુસાર, પાટણમાં રહેતા અને મજૂરી કામ કરી પરિવારનું ગુજરાન ચલાવતા સુનિતાબેન પટણીએ તાજેતરમાં તેમના પતિ દેવજીભાઈને પરિવારના આર્થિક હિતમાં એક સલાહ આપી હતી. તેમણે પતિને નવું દેવું ન કરવા અને બાળકોના ઉજ્જવળ ભવિષ્ય માટે પૈસાની બચત કરીને પોતાનું મકાન બનાવવા માટે સમજાવવાનો પ્રયાસ કર્યો હતો. જોકે, પત્નીની આ સાચી વાત પતિ દેવજીભાઈને ગળે ઉતરી ન હતી અને તેઓ અચાનક ઉશ્કેરાઈ ગયા હતા.

દાતરડા વડે હુમલો કરી ગળું દબાવવાનો પ્રયાસ 

ઉશ્કેરાયેલા પતિ દેવજીભાઈએ પત્ની સુનિતાબેન સાથે બિભત્સ ગાળાગાળી શરૂ કરી દીધી હતી. જ્યારે પત્નીએ આ ગાળો બોલવાનો વિરોધ કર્યો, ત્યારે પતિએ હિંસક સ્વરૂપ ધારણ કરી લીધું હતું. પતિએ સુનિતાબેનને જમીન પર પછાડી દીધા હતા અને તેમનું ગળું દબાવીને જીવલેણ હુમલો કર્યો હતો. આટલેથી ન અટકતા, ઘરમાં પડેલા દાતરડા વડે પણ પત્નીને માર માર્યો હતો.

સાસરિયાઓએ બચાવવાને બદલે અત્યાચારમાં સાથ આપ્યો 

આ સમગ્ર હુમલા દરમિયાન સુનિતાબેનના સાસુ કાંતાબેન અને સસરા રાયાભાઈ પણ ત્યાં હાજર હતા. પરંતુ તેમણે વહુને બચાવવાને બદલે તેને પકડી રાખીને પોતાના પુત્રને માર મારવામાં મદદ કરી હતી. પતિએ સુનિતાબેનના વાળ પકડીને જમીન પર ઢસડ્યા હતા અને ગડદાપાટુનો બેરહેમ માર માર્યો હતો. સસરા રાયાભાઈએ પણ ઉશ્કેરાઈને લાકડાનો ટુકડો ફેંક્યો હતો, જે સદનસીબે સુનિતાબેનને વાગ્યો ન હતો. આ ક્રૂર ઘટના બાદ સાસરિયાઓએ પીડિતાને ઘરમાં જ પૂરી દીધી હતી અને બહાર જવા દીધી ન હતી.

પોલીસ ફરિયાદ બાદ વધુ તપાસ શરૂ 

બીજા દિવસે અત્યાચાર ગુજાર્યા બાદ પતિ દેવજીભાઈ પત્ની સુનિતાબેનને શહેરના મોતીસા ચોક વિસ્તારમાં તરછોડીને ચાલ્યો ગયો હતો. ત્યાંથી પીડિતા મહામહેનતે પોતાના પિતાના ઘરે પહોંચી હતી. પ્રાથમિક સારવાર લીધા બાદ સુનિતાબેને હિંમત એકઠી કરીને પોતાના ક્રૂર પતિ અને સાસુ-સસરા વિરુદ્ધ પોલીસ મથકે પહોંચીને સત્તાવાર ફરિયાદ નોંધાવી છે.