ઉનાળાના આગમન સાથે જ ઘરોમાં ઠંડા પાણીની માંગ વધે છે અને ફ્રિજમાં પ્લાસ્ટિકની બોટલોનો ખડકલો થઈ જાય છે. તરસ છીપાવવા માટે આપણે વારંવાર આ જ બોટલોનો ઉપયોગ કરીએ છીએ, પરંતુ શું તમે ક્યારેય વિચાર્યું છે કે ઉપરથી સ્વચ્છ દેખાતી આ બોટલ અંદરથી કેટલી જોખમી હોઈ શકે? જો તમે બોટલને માત્ર સાદા પાણીથી ધોઈને ફરી ભરી દો છો, તો તમે અજાણતા ગંભીર બીમારીઓને આમંત્રણ આપી રહ્યા છો.

પ્લાસ્ટિકની બોટલના તળિયે જામતું ચીકણું પડ અને ભેજને કારણે પેદા થતા બેક્ટેરિયા તમારા સ્વાસ્થ્ય માટે જીવલેણ સાબિત થઈ શકે છે. આજે અમે તમને જણાવીશું કે કેવી રીતે રસોડાની માત્ર બે-ત્રણ વસ્તુઓ અને દેશી જુગાડની મદદથી તમે આ બોટલોને મિનિટોમાં જંતુમુક્ત કરી નવી જેવી ચમકાવી શકો છો.

ગરમ પાણી અને મીઠાનો પ્રયોગ

પાણીની બોટલોને કુદરતી રીતે સાફ કરવાની સૌથી શ્રેષ્ઠ રીત ગરમ પાણી અને મીઠાનો ઉપયોગ છે. બોટલમાં મીઠાવાળું નવશેકું પાણી નાખીને તેને થોડા સમય માટે છોડી દેવી જોઈએ. મીઠું એક નેચરલ ક્લીનરની જેમ કામ કરે છે, જે બોટલની અંદર જામેલી ગંદકીને ઢીલી કરી દે છે અને જર્મ્સનો નાશ કરવામાં મદદ કરે છે.

બેકિંગ સોડા અને લીંબુનો નુસખો

કેમિકલ વગર બોટલ ચમકાવવા માટે બેકિંગ સોડા અને લીંબુનો ઉપયોગ કરી શકાય છે. બેકિંગ સોડા બોટલની દુર્ગંધ દૂર કરવામાં રામબાણ ઈલાજ છે, જ્યારે લીંબુમાં રહેલું એસિડ જીવલેણ બેક્ટેરિયાનો નાશ કરે છે. આ બંનેનું મિશ્રણ બોટલમાં નાખી 15 મિનિટ રાખ્યા બાદ બ્રશથી સાફ કરવાથી બોટલ એકદમ ફ્રેશ અને જંતુમુક્ત થઈ જાય છે.

જિદ્દી ડાઘ માટે વિનેગરનો ઉપયોગ

જો તમારી બોટલમાં વધુ પડતા જિદ્દી ડાઘ હોય, તો સફેદ વિનેગર ખૂબ જ અસરકારક સાબિત થાય છે. અડધી બોટલમાં પાણી અને અડધી બોટલમાં વિનેગર ભરીને તેને આખી રાત માટે છોડી દેવી જોઈએ. બીજા દિવસે સવારે તેને સાફ પાણીથી ધોઈ લેવાથી માત્ર ડાઘ જ નથી હટતા પણ ગમે તેવી જૂની બોટલ પણ બિલકુલ નવી જેવી ચમકવા લાગે છે.

 ઢાંકણની સફાઈ અને અન્ય ટિપ્સ

બોટલ સાફ કરતી વખતે મોટાભાગના લોકો તેના ઢાંકણને નજરઅંદાજ કરે છે, જ્યારે વાસ્તવમાં જર્મ્સ સૌથી વધુ ઢાંકણ અને મોઢાના ભાગે જ હોય છે. ઢાંકણને અલગ કરીને તેને પણ ગરમ પાણી અને સોડામાં પલાળીને સાફ કરવું જોઈએ. જો તમારી પાસે બોટલ સાફ કરવાનું બ્રશ ન હોય, તો અંદર થોડા ચોખાના દાણા નાખીને હલાવવાથી પણ અંદરની સફાઈ સરળતાથી થઈ શકે છે.

બોટલને સૂકવવાનું મહત્વ

સફાઈ કર્યા પછી બોટલને યોગ્ય રીતે સૂકવવી પણ એટલી જ જરૂરી છે. જો બોટલ અંદરથી ભીની રહે તો તેમાં ફરીથી બેક્ટેરિયા ઝડપથી ફેલાઈ શકે છે. તેથી, ધોયા પછી બોટલને ઊંધી કરીને ખુલ્લી હવામાં પૂરેપૂરી સૂકવવા દેવી જોઈએ. જ્યારે બોટલ સંપૂર્ણપણે કોરી થઈ જાય ત્યારે જ તેનો ફરીથી ઉપયોગ કરવો હિતાવહ છે.