વડાપ્રધાન નરેન્દ્ર મોદીએ શનિવારે એક મોટી જાહેરાત કરતા જણાવ્યું છે કે લોકસભા અને રાજ્ય વિધાનસભાઓમાં મહિલાઓ માટે 33 ટકા અનામતને ઝડપથી અમલમાં મૂકવા માટે સંસદના ચાલુ બજેટ સત્રને 16, 17 અને 18 એપ્રિલ એમ વધુ 3 દિવસ માટે લંબાવવામાં આવશે. સરકારનો મુખ્ય ઉદ્દેશ્ય વર્ષ 2029 ની સામાન્ય ચૂંટણીઓથી 'નારી શક્તિ વંદન અધિનિયમ' હેઠળ મહિલા અનામતને સંપૂર્ણપણે લાગુ કરવાનો છે.

2029 થી મહિલાઓ 33 ટકા બેઠકો પર બિરાજશે

 મહિલા સશક્તિકરણ પર ભાર મૂકતા પીએમ મોદીએ સ્પષ્ટ કર્યું હતું કે તેમની સરકાર કાયદાકીય સંસ્થાઓમાં મહિલાઓને એક તૃતીયાંશ પ્રતિનિધિત્વ આપવા કટિબદ્ધ છે. તેમણે કહ્યું કે, "અમે ઈચ્છીએ છીએ કે 2029 ની લોકસભા ચૂંટણીથી સંસદની 33 ટકા બેઠકો પર આપણી બહેનો બિરાજમાન હોય." લંબાવવામાં આવેલા આ વિશેષ સત્રમાં અનામતને અસરકારક બનાવવા માટે જરૂરી વૈધાનિક અને બંધારણીય જોગવાઈઓ પર ધ્યાન કેન્દ્રિત કરવામાં આવશે.

વિશેષ સત્રના બે મુખ્ય ઉદ્દેશ્યો: નવી બેઠકો ઉમેરવા વિચારણા 

પીએમ મોદીએ આ 3 દિવસીય સત્રના બે મુખ્ય એજન્ડા સ્પષ્ટ કર્યા હતા. પ્રથમ, દક્ષિણના રાજ્યો (કેરળ, તમિલનાડુ, કર્ણાટક, આંધ્રપ્રદેશ, તેલંગાણા અને ગોવા) કે જેમણે વસ્તી નિયંત્રણમાં સારું પ્રદર્શન કર્યું છે, તેમને એવું કાયદાકીય આશ્વાસન આપવું કે સીમાંકનના કારણે તેમની લોકસભાની બેઠકોમાં કોઈ ઘટાડો થશે નહીં. બીજું, સરકાર મહિલા અનામત બેઠકોને "વધારાની બેઠકો" તરીકે ઉમેરવા પર વિચાર કરી રહી છે. આનાથી લોકસભા અને વિધાનસભાઓની કુલ બેઠકોની સંખ્યામાં વધારો થશે, જેથી મહિલાઓ માટે જગ્યા વધારવાની સાથે સાથે વર્તમાન સાંસદો અને પ્રતિનિધિત્વને કોઈ નુકસાન ન થાય.

'40 વર્ષથી પેન્ડિંગ અધિકારો હવે ન રોકવા જોઈએ' 

તમામ રાજકીય પક્ષો, ખાસ કરીને કોંગ્રેસ અને ઈન્ડિયા (INDIA) ગઠબંધન પાસે સર્વસંમતિથી સમર્થનની માંગ કરતા વડાપ્રધાને જણાવ્યું હતું કે, "આપણી માતાઓ અને બહેનોના અધિકારો લગભગ 40 વર્ષથી પેન્ડિંગ છે. 2029 ની ચૂંટણીઓ માટે તેમાં ફરીથી વિલંબ થવો જોઈએ નહીં." તેમણે દેશભરની મહિલાઓને પણ અપીલ કરી હતી કે તેઓ આ કાયદાને કોઈપણ રાજકીય વિલંબ વિના પસાર કરાવવા માટે દબાણ ઉભું કરે.

આગામી સત્રમાં વિપક્ષ OBC ક્વોટાનો મુદ્દો ઉઠાવી શકે છે 

ઉલ્લેખનીય છે કે સપ્ટેમ્બર 2023 માં સંસદના વિશેષ સત્રમાં આ બિલ પસાર કરવામાં આવ્યું હતું, પરંતુ તેનો અમલ વસ્તી ગણતરી અને સીમાંકન સાથે જોડાયેલો હતો. હવે સૂચિત ફેરફારો દ્વારા સરકાર આ પ્રક્રિયાને ઝડપી બનાવવા માંગે છે. જોકે, આગામી 3 દિવસીય બેઠકમાં વિપક્ષ દ્વારા ઓબીસી (OBC) મહિલાઓ માટે અલગ સબ-ક્વોટા અને સીમાંકનના મુદ્દે વિસ્તૃત ચર્ચા અને માંગણીઓ ઉઠાવવામાં આવે તેવી પૂરી શક્યતા છે.