કેન્દ્ર સરકાર અને ગેસ કંપનીઓની સતત મુહિમના પરિણામે છેલ્લા એક મહિનામાં 8 લાખ નવા પીએનજી (PNG) કનેક્શન જોડવામાં આવ્યા છે. ઘરગથ્થુ અને વ્યાપારી ઉપયોગ માટે પાઇપ્ડ નેચરલ ગેસને પ્રોત્સાહન આપવા અને કુકિંગ ગેસ સિલિન્ડરો પરની અવલંબન ઘટાડવા માટે સરકાર સતત પ્રયાસ કરી રહી છે.

એક ઉચ્ચ અધિકારીએ જણાવ્યું કે, છેલ્લા મહિનામાં 50 લાખ સિલિન્ડરોની ડિલિવરી કરવામાં આવી છે. આથી ઘરગથ્થુ માંગ પૂરેપૂરી અને વ્યાપારી માંગ 80% સુધી પૂરી થઈ છે.

સિલિન્ડરની અછતનો કોઈ ડર નથી
અધિકારીએ સ્પષ્ટ કર્યું કે, કોઈને પણ અછતનો ડર રાખવાની જરૂર નથી. નવા પીએનજી કનેક્શન્સમાંથી લગભગ અડધા કનેક્શન ઘરો અને વ્યાપારી ઉપયોગ માટે ચાલુ થઈ ગયા છે, જ્યારે બાકીના પ્રક્રિયામાં છે.

સરકારની આ પહેલ પછી 16 હજારથી વધુ LPG કનેક્શન સરેન્ડર કરવામાં આવ્યા છે, જેથી જેમની પાસે પાઇપ્ડ ગેસના કનેક્શન છે તેઓ સિલિન્ડર પોતાની પાસે ન રાખે. આથી સિસ્ટમ પર દબાણ ઘટે છે.

પેટ્રોલિયમ ઉત્પાદનો અને કુકિંગ ગેસનો પુરતો સ્ટોક
અધિકારીએ કહ્યું કે, ક્રૂડ ઓઇલ, પેટ્રોલિયમ ઉત્પાદનો અને કુકિંગ ગેસનો પુરતો સ્ટોક ઉપલબ્ધ છે અને તેને સતત ભરવામાં આવી રહ્યો છે. તેમણે જણાવ્યું કે, “છેલ્લા એક મહિનાથી અમે સારું કામ કરી રહ્યા છીએ અને જ્યાં જરૂર હોય ત્યાંથી સપ્લાયની વ્યવસ્થા કરી રહ્યા છીએ અને આયાત પણ કરી રહ્યા છીએ.”

ઓનલાઇન બુકિંગ અને ડિલિવરીમાં સુધારો
- ઓનલાઇન સિલિન્ડર બુકિંગ વધીને 95% થઈ ગઈ છે.
- આધાર આધારિત ઓથેન્ટિકેશન કોડ સાથે ડિલિવરી વધીને 90% થઈ છે (ફેબ્રુઆરીમાં 53% હતી).
- આનો હેતુ ડિસ્ટ્રિબ્યુટર સ્તરે થતી હેરાફેરીને રોકવાનો છે.

પ્રવાસીઓ માટે પોર્ટેબલ સિલિન્ડર
પ્રવાસીઓ અને જેમની પાસે નિયમિત LPG કનેક્શન નથી, તેમની મદદ માટે તેલ કંપનીઓએ 23 માર્ચથી અત્યાર સુધીમાં આશરે 6.6 લાખ 5 કિલોના પોર્ટેબલ સિલિન્ડર વેચ્યા છે. તેમાંથી 90,000 સિલિન્ડર માત્ર શનિવારે વેચાયા છે. આ આંકડો યુદ્ધ પહેલાંના રોજિંદા 70-75 હજારના સરેરાશ કરતાં વધુ છે.

સરકારને આશા છે કે, તાજેતરમાં લેવાયેલા પગલાંથી તે ઉદ્યોગો સુધી કાચા માલની સપ્લાય સુધરશે જે અત્યારે અછતનો સામનો કરી રહ્યા છે.