ગુજરાત પ્રદેશ ભાજપના સંગઠનમાં ધરખમ ફેરફારો બાદ હવે સ્થાનિક સ્વરાજ્યની ચૂંટણીઓનો જંગ જામ્યો છે. સી.આર. પાટીલ બાદ પ્રદેશ અધ્યક્ષ તરીકે જગદીશ વિશ્વકર્મા માટે આ પ્રથમ મોટી રાજકીય કસોટી સાબિત થશે. પક્ષે આ વખતે ઉમેદવારોની પસંદગી માટે અત્યંત કડક માર્ગદર્શિકા તૈયાર કરી છે, જેનાથી ઘણા જૂના જોગીઓને ઘેર બેસવાનો વારો આવી શકે છે. સૂત્રોના જણાવ્યા અનુસાર, ભાજપ આ વખતે એન્ટી-ઈન્કમ્બન્સી રોકવા માટે ‘નો-રિપીટ’ ફોર્મ્યુલા લાગુ કરવા મક્કમ છે.

જે નેતાઓ સતત ત્રણ ટર્મ (15 વર્ષ) સુધી ચૂંટણી લડ્યા છે અથવા જીત્યા છે, તેમને આ વખતે આરામ આપવામાં આવશે.આ ઉપરાંત, 60 વર્ષથી વધુ વય ધરાવતા દાવેદારોને પણ ટિકિટ ન આપવાનું પક્ષે મન બનાવ્યું છે. નવા અને યુવા ચહેરાઓને પ્રોત્સાહન આપવા છતાં પક્ષે વફાદારીને સર્વોપરી ગણી છે. જે કાર્યકર પક્ષમાં ઓછામાં ઓછા  વર્ષથી સક્રિય સભ્ય તરીકે કાર્યરત હોય, તેને જ ચૂંટણી મેદાનમાં ઉતારવા માટે પ્રાથમિકતા આપવામાં આવશે.

સંગઠનમાં પ્રમુખ કે મહામંત્રી જેવા મહત્વના હોદ્દા ધરાવતા નેતાઓને કોર્પોરેશનની ટિકિટથી દૂર રાખવામાં આવશે, જેથી સંગઠન અને સત્તા વચ્ચે સંતુલન જળવાય. ભાજપના આ નિર્ણયનો મુખ્ય હેતુ પક્ષના સંનિષ્ઠ અને પાયાના કાર્યકરોને તક આપવાનો છે. આ નવી ગાઈડલાઈનથી વર્ષોથી જામી પડેલા કાઉન્સિલરો અને નેતાઓમાં ફફડાટ વ્યાપી ગયો છે. જૂના જોગીઓના પત્તા કાપીને ભાજપ મહાનગરપાલિકાઓ અને પંચાયતોમાં નવી પેઢીના નેતાઓને તૈયાર કરવા માંગે છે.