પોરબંદરમાં હનુમાન મહોત્સવ અને વંદના મહોત્સવ અંતર્ગત એક ભવ્ય મહારક્તદાન કેમ્પનું આયોજન કરવામાં આવ્યું છે. કેન્દ્રીય કેબિનેટ મંત્રી અને પોરબંદરના સાંસદ ડૉ. મનસુખભાઈ માંડવિયાએ પોતે રક્તદાન કરીને આ સેવાયજ્ઞનો શુભારંભ કરાવ્યો હતો. બે દિવસ ચાલનારા આ કેમ્પમાં 10,000 બોટલ રક્ત એકત્ર કરી એક નવો રેકોર્ડ પ્રસ્થાપિત કરવાનો નિર્ધાર કરવામાં આવ્યો છે.

હનુમાન જયંતી પર મહાદાનનો સંકલ્પ

હનુમાન જયંતીના પાવન અવસરે આયોજિત આ મહારક્તદાન કેમ્પમાં લોકોનો ભારે ઉત્સાહ જોવા મળી રહ્યો છે. આ ભગીરથ કાર્યમાં સામાન્ય જનતાની સાથે પોલીસ પરિવાર, ડિફેન્સ, કોસ્ટગાર્ડ અને વિવિધ સામાજિક સંસ્થાઓ પણ ઉત્સાહભેર જોડાઈ છે. ડૉ. મનસુખભાઈ માંડવિયાએ આ પ્રસંગે રક્તદાતાઓને પ્રોત્સાહિત કરતા જણાવ્યું હતું કે, રક્તદાન એ મહાદાન છે અને આ રક્ત અનેક લોકોની જિંદગી બચાવવા માટે ઉપયોગી સાબિત થશે.

જિલ્લાના 5 વિવિધ સ્થળોએ કેમ્પનું આયોજન 

આ મહારક્તદાન કેમ્પ માત્ર પોરબંદર શહેર પૂરતો સીમિત ન રાખતા સમગ્ર જિલ્લાને આવરી લેવામાં આવ્યો છે. વહીવટી તંત્ર અને આયોજકો દ્વારા આ કેમ્પ પોરબંદર ઉપરાંત રાણાવાવ, કુતિયાણા, બગવદર અને કડછ ખાતે પણ આયોજિત કરવામાં આવ્યો છે. આજે અને આવતીકાલે એમ સતત 2 દિવસ સુધી આ તમામ સ્થળોએ રક્તદાન પ્રવૃત્તિ ચાલશે, જેમાં હજારોની સંખ્યામાં લોકો રક્તદાન કરી રહ્યા છે.

દર્દીઓ માટે સંજીવની બનશે એકત્રિત રક્ત 

આ મહાઅભિયાન થકી એકત્ર થનાર 10,000 બોટલ જેટલું રક્ત પોરબંદર જિલ્લાના જરૂરિયાતમંદ દર્દીઓ માટે સંજીવની સમાન બની રહેશે. આયોજકોના જણાવ્યા અનુસાર, એકત્રિત થનાર આ લોહી પોરબંદર, જામનગર, જૂનાગઢ અને અમદાવાદની સરકારી હોસ્પિટલો તેમજ વિવિધ બ્લડ બેંકોમાં અર્પણ કરવામાં આવશે. તેનો સીધો લાભ પોરબંદર જિલ્લાના દર્દીઓને મળશે.