આસામ વિધાનસભા ચૂંટણીના પ્રચાર વચ્ચે કોંગ્રેસ નેતા રાહુલ ગાંધીએ રવિવારે વિશ્વનાથ જિલ્લામાં એક વિશાળ જનસભાને સંબોધી હતી. આ રેલીમાં તેમણે આસામના મુખ્યમંત્રી હિમંતા બિસ્વા સરમા પર ભ્રષ્ટાચાર અને વિભાજનકારી રાજનીતિના ગંભીર આરોપો લગાવ્યા હતા. ગાંધીએ સ્પષ્ટ ચીમકી આપી હતી કે રાજ્યમાં કોંગ્રેસની સરકાર બન્યા બાદ મુખ્યમંત્રી સામે કડક કાયદાકીય કાર્યવાહી કરવામાં આવશે.

'ભ્રષ્ટાચાર અને વિશ્વાસઘાત માટે જનતા ક્યારેય માફ નહીં કરે'

આસામના વિશ્વનાથ જિલ્લામાં રેલીને સંબોધતા રાહુલ ગાંધીએ મુખ્યમંત્રી પર સીધો હુમલો કર્યો હતો. તેમણે આરોપ લગાવ્યો કે, "હિમંતા બિસ્વા સરમા દેશના સૌથી ભ્રષ્ટ અને સૌથી કોમી મુખ્યમંત્રી છે. તેમણે આસામના લોકો સાથે વિશ્વાસઘાત કર્યો છે અને તેમને ગેરમાર્ગે દોર્યા છે -- પુરાવા જનતાની સામે છે." તેમણે વધુમાં દાવો કર્યો હતો કે આસામની જનતા વર્તમાન સરકારના ભ્રષ્ટાચારને ક્યારેય ભૂલશે નહીં અને તેમની સજા નિશ્ચિત છે.

ઝુબીન ગર્ગનો ઉલ્લેખ અને કોંગ્રેસની વિચારધારા

પોતાના સંબોધન દરમિયાન રાહુલ ગાંધીએ પ્રખ્યાત આસામી ગાયક ઝુબીન ગર્ગનો ખાસ ઉલ્લેખ કર્યો હતો. તેમણે ઝુબીનના જીવન અને કોંગ્રેસની વિચારધારા વચ્ચે સમાનતા દર્શાવતા કહ્યું કે, "ઝુબીન ગર્ગે આસામના લોકોને એક કરવા માટે આખું જીવન કામ કર્યું. તેમણે ક્યારેય કોઈની સાથે ગેરવર્તન કર્યું નથી. કોંગ્રેસની ફિલસૂફી પણ તેવી જ છે -- નફરત સામે પ્રેમ ફેલાવવો." તેમણે ભાજપની આગેવાની હેઠળની સરકાર પર રાજકીય ફાયદા માટે સમુદાયો વચ્ચે ભાગલા પાડવાનો અને આસામના ઐતિહાસિક સાંસ્કૃતિક મૂલ્યોને નષ્ટ કરવાનો આરોપ લગાવ્યો હતો.

કોંગ્રેસ સત્તામાં આવતા જ કાયદાકીય કાર્યવાહીની ચીમકી

ગાંધીએ પોતાના હુમલાને વધુ તેજ કરતા મુખ્યમંત્રીને સીધી ચેતવણી આપતા જણાવ્યું હતું કે, "તેમને હજુ થોડા દિવસો બોલવા દો. તે પછી, આસામમાં કોંગ્રેસ સરકાર બનાવશે અને જો તેઓ માફી માંગશે તો પણ તેમની સામે કાયદાકીય કાર્યવાહી કરવામાં આવશે.

ઉલ્લેખનીય છે કે આસામ વિધાનસભા ચૂંટણીને લઈને હાલ રાજ્યમાં પ્રચાર પૂરજોશમાં ચાલી રહ્યો છે. આગામી 9 એપ્રિલના રોજ મતદાન યોજાવાનું છે અને 4 મેના રોજ મતગણતરી થશે.