રાજકોટ ગ્રામ્ય પોલીસના સાયબર સેલ દ્વારા ચલાવવામાં આવી રહેલા 'ઓપરેશન મ્યૂલ હન્ટ' અંતર્ગત એક ખૂબ જ મોટું અને ચોંકાવનારું નાણાકીય કૌભાંડ પ્રકાશમાં આવ્યું છે. રાજકોટ SP વિજયસિંહ ગુર્જરના જણાવ્યા અનુસાર આ રાષ્ટ્રવ્યાપી સાયબર ફ્રોડના મામલે પોલીસે કડક કાર્યવાહી કરતા અત્યાર સુધીમાં અનેક આરોપીઓને ઝડપી પાડ્યા છે, જેમાં આજે 16માં આરોપી તરીકે મનીષ ચોરેલાની ધરપકડ કરવામાં આવી છે. પોલીસ તપાસમાં સામે આવ્યું છે કે ઝડપાયેલો આરોપી પોતે મ્યૂલ એકાઉન્ટ ધારક હતો અને તેના દ્વારા મોટા પાયે ગેરકાયદેસર નાણાકીય વ્યવહારો કરવામાં આવતા હતા. આ કેસની ગંભીરતાનો અંદાજ એ વાત પરથી લગાવી શકાય છે કે આ સમગ્ર નેટવર્ક દ્વારા અંદાજે 16 કરોડથી વધુની છેતરપિંડી આચરવામાં આવી છે અને અત્યાર સુધીમાં 400 કરોડથી વધુના શંકાસ્પદ ટ્રાન્ઝેક્શનની વિગતો પોલીસના હાથે લાગી છે. રાજકોટ SP વિજયસિંહ ગુર્જર

આ કૌભાંડના મૂળિયાં સૌરાષ્ટ્રના વેપારી મથકો સુધી ઊંડા ઉતરેલા જોવા મળ્યા છે, જેમાં ખાંભા, સાવરકુંડલા, લાઠી, ગોંડલ અને રાજકોટના બેડી માર્કેટિંગ યાર્ડની વિવિધ પેઢીઓનો ઉપયોગ નાણાકીય વ્યવહારો માટે કરવામાં આવ્યો હોવાનું ખૂલ્યું છે. પ્રાથમિક તપાસ મુજબ, આ પેઢીઓ મારફતે અંદાજિત 1500 કરોડ રૂપિયાના મ્યૂલ એકાઉન્ટ ટ્રાન્ઝેક્શન થયા હોવાનો અંદાજ છે, જે સાયબર ક્રાઇમના ઇતિહાસમાં એક મોટો આંકડો ગણી શકાય. આટલી મોટી રકમના વ્યવહારોની ઊંડાણપૂર્વક તપાસ કરવા માટે સરકાર દ્વારા ખાસ એમ્પનેલ કરવામાં આવેલી ચાર્ટર્ડ એકાઉન્ટન્ટ (CA) પેઢીની પણ મદદ લેવામાં આવી રહી છે. આ નિષ્ણાત ટીમ હાલમાં તમામ નાણાકીય દસ્તાવેજો અને બેંક વિગતોની બારીકાઈથી તપાસ કરી રહી છે જેથી આ કૌભાંડના મુખ્ય સૂત્રધારો સુધી પહોંચી શકાય.

અગાઉ આ કેસમાં 15 આરોપીઓની ધરપકડ કરવામાં આવી હતી અને મનીષ ચોરેલાની ધરપકડ સાથે તપાસનો વ્યાપ વધુ વિસ્તર્યો છે. સાયબર સેલની ટીમ આ નેટવર્ક કેવી રીતે કાર્યરત હતું અને કઈ રીતે સામાન્ય લોકોના ડેટા અથવા બોગસ પેઢીઓનો ઉપયોગ કરીને આટલા મોટા પ્રમાણમાં નાણાંની હેરફેર કરવામાં આવતી હતી તેની તપાસ કરી રહી છે. આગામી દિવસોમાં આ મામલે હજુ પણ મોટા ખુલાસા થવાની અને અન્ય સંડોવાયેલા શખ્સોની ધરપકડ થવાની પૂરેપૂરી શક્યતા સેવાઈ રહી છે. પોલીસની આ સફળ કાર્યવાહીને પગલે સાયબર ગુનેગારોમાં ફફડાટ વ્યાપી ગયો છે.