રાજકોટના પશ્ચિમ વિસ્તારમાં આવેલા પોશ ગણાતા આમ્રપાલી ફાટક પાસેની શ્રેયસ સોસાયટીમાં આજે બપોરના સમયે એક હચમચાવી દેનારો અકસ્માત સર્જાયો હતો. એક લક્ઝરી મર્સિડીઝ કારના ચાલકે સ્ટેયરિંગ પરથી કાબૂ ગુમાવતા કારે રસ્તામાં આવતા અનેક વાહનોને કચડી નાખ્યા હતા. આ ઘટનાને પગલે સમગ્ર સોસાયટીમાં અફરાતફરી મચી ગઈ હતી અને લોકોના ટોળેટોળા રસ્તા પર ઉતરી આવ્યા હતા. સદનસીબે આ ભયાનક અકસ્માતમાં કોઈ જાનહાનિના સમાચાર નથી, પરંતુ વાહનોનો કચ્ચરઘાણ નીકળી ગયો છે. મર્સિડીઝ કાર એટલી ફૂલ સ્પીડમાં હતી કે ચાલક તેને સંભાળી શક્યો ન હતો.

કારે રસ્તામાં પાર્ક કરેલા અને પસાર થઈ રહેલા કુલ 3 એક્ટિવા અને 2 ફોર વ્હીલર કારને જોરદાર ટક્કર મારી હતી. ટક્કર એટલી પ્રચંડ હતી કે એક્ટિવા સવાર લોકો હવામાં ફંગોળાયા હતા અને પાર્ક કરેલી ગાડીઓના ફુરચા ઉડી ગયા હતા. અકસ્માત બાદ કાર ચાલક ઘટનાસ્થળે જ સ્તબ્ધ થઈ ગયો હતો, જ્યારે સ્થાનિક લોકોએ ઈજાગ્રસ્તોની મદદ માટે દોડધામ કરી હતી. આ સમગ્ર અકસ્માતની ઘટના સોસાયટીમાં લાગેલા સીસીટીવી કેમેરામાં કેદ થઈ ગઈ છે. વીડિયોમાં સ્પષ્ટ જોઈ શકાય છે કે મર્સિડીઝ કાર ગોળીની રફ્તારે આવી રહી હતી અને એક પછી એક વાહનોને હડફેટે લેતી ગઈ હતી. સીસીટીવી ફૂટેજ સામે આવતા જ સોશિયલ મીડિયા પર વાયરલ થયા છે, જેને જોઈને લોકોમાં ભારે રોષ જોવા મળી રહ્યો છે.

લક્ઝરી કાર ચાલકોની આવી બેદરકારી સામે કડક પગલાં લેવાની માંગ ઉઠી રહી છે. ઘટનાની જાણ થતા જ સ્થાનિક પોલીસનો કાફલો ઘટનાસ્થળે દોડી આવ્યો હતો. પોલીસે અકસ્માત સર્જનાર મર્સિડીઝ કારને કબજે કરી છે અને ચાલકની અટકાયત કરવાની તજવીજ હાથ ધરી છે. પ્રાથમિક તપાસમાં ચાલક નશામાં હતો કે કેમ અથવા તો ગાડીમાં કોઈ યાંત્રિક ખામી સર્જાઈ હતી તે દિશામાં તપાસ શરૂ કરવામાં આવી છે.  પોલીસે સીસીટીવી ફૂટેજને પુરાવા તરીકે કબજે કરીને આગળની કાયદેસરની કાર્યવાહી તેજ કરી છે.

અકસ્માતનો ભોગ બનેલા વાહન માલિકોમાં ભારે આક્રોશ જોવા મળ્યો હતો. શ્રેયસ સોસાયટીના રહીશોના જણાવ્યા મુજબ, રહેણાંક વિસ્તારમાં આવી રીતે બેફામ ગાડીઓ ચલાવનારા તત્વો સામે દાખલો બેસે તેવી કાર્યવાહી થવી જોઈએ. નસીબજોગે કોઈ મોટું જાનહાનિનું નુકસાન ટળ્યું છે, નહીંતર સ્થિતિ વધુ ગંભીર બની શકી હોત. અકસ્માતગ્રસ્ત વાહનોને રસ્તા પરથી હટાવીને ટ્રાફિક ક્લિયર કરવામાં આવ્યો હતો. આ ઘટના બાદ રાજકોટના પોશ વિસ્તારોમાં સ્પીડ બ્રેકર અને સીસીટીવી સર્વેલન્સ વધારવાની ચર્ચાએ ફરી વેગ પકડ્યો છે.