રાજકોટ મહાનગરપાલિકાના 1 થી 18 વોર્ડ માટે આજે 1 એપ્રિલ 2026ના રોજ અત્યંત મહત્વપૂર્ણ ગણાતી આખરી મતદાર યાદી પ્રસિદ્ધ કરવામાં આવી છે. લાંબા સમયથી ચાલી રહેલી મતદાર યાદી શુદ્ધિકરણની પ્રક્રિયા બાદ હવે શહેરમાં કુલ મતદારોની સંખ્યામાં મોટો ઘટાડો નોંધાયો છે. જોકે તાજેતરમાં SIR એટલે કે સ્પેશિયલ ઇન્ટેન્સિવ રિવિઝન અંતર્ગત ખાસ મતદાર યાદી સુધારણા ઝુંબેશ કરવામાં આવી, જેના પરિણામે અગાઉ જે મતદારોની સંખ્યા 10,93,991 હતી, તે ઘટીને હવે 9,85,952 પર આવી ગઈ છે.  આ કુલ મતદારોમાં 5,10,086 પુરુષો, 4,75,848 સ્ત્રીઓ અને 18 અન્ય જાતિના મતદારોનો સમાવેશ થાય છે. મતદાર યાદીને સચોટ અને પારદર્શક બનાવવા માટે ચૂંટણી તંત્ર દ્વારા આ આંકડાકીય ફેરફારને ખૂબ જ ગંભીરતાથી લેવામાં આવ્યો છે.

આ શુદ્ધિકરણ પ્રક્રિયા પાછળનું મુખ્ય કારણ યાદીમાં રહેલી ક્ષતિઓ દૂર કરવાનું છે, જેમાં અનેક કારણોસર મોટી સંખ્યામાં નામ રદ કરવામાં આવ્યા છે. મનપાની ચૂંટણી શાખાના મેનેજર પ્રણય પંચાલ દ્વારા આપવામાં આવેલી માહિતી મુજબ, જે મતદારો અન્ય જગ્યાએ સ્થાયી થઈ ગયા છે, જેમનું અવસાન થયું છે, જેમના નામ ડુપ્લીકેટ એટલે કે એકથી વધુ વખત નોંધાયેલા હતા, અથવા જેઓ લાંબા સમયથી મતદાન મથકો પર ગેરહાજર (એબસન્ટ) જોવા મળ્યા હતા, તેવા તમામ નામોની સત્યતા તપાસીને યાદીમાંથી દૂર કરવામાં આવ્યા છે. તંત્રની આ કવાયતનો મુખ્ય ઉદ્દેશ્ય આગામી સમયમાં યોજાનારી ચૂંટણીઓમાં મતદાન પ્રક્રિયાને વધુ સુચારુ અને ચોકસાઈપૂર્ણ બનાવવાનો છે.

આ સુધારેલી યાદી સાથે જ આગામી ચૂંટણીઓ માટે તંત્ર દ્વારા તૈયારીઓ પણ પૂર્ણ કરી લેવામાં આવી છે, જેમાં સમગ્ર શહેરમાં મતદાન માટે 1,014 જેટલા મતદાન મથકો ફાળવવામાં આવ્યા છે. આ નવા મતદાન મથકો પરથી હવે શુદ્ધિકરણ પામેલી આખરી યાદી મુજબ નાગરિકો પોતાના મતાધિકારનો ઉપયોગ કરી શકશે. ચૂંટણી તંત્રની આ કામગીરીથી હવે યાદીમાં માત્ર ખરા અને સક્રિય મતદારો જ બાકી રહ્યા છે, જે લોકશાહીના પર્વમાં મતદાનની ટકાવારી અને શુદ્ધતા જાળવવામાં મહત્વની ભૂમિકા ભજવશે.