રાજકોટ મહાનગરપાલિકાની ચૂંટણીના માહોલ વચ્ચે વોર્ડ નંબર 17માં રાજકીય ભૂકંપ જેવી સ્થિતિ સર્જાઈ છે. કોંગ્રેસ દ્વારા જાહેર કરવામાં આવેલી ઉમેદવારોની યાદીમાં પૂર્વ કોર્પોરેટર ઘનશ્યામસિંહ જાડેજાનું નામ કપાઈ જતાં સ્થાનિક લોકોમાં ભારે રોષ જોવા મળી રહ્યો છે. શહેરના હસનવાડી વિસ્તારમાં મોટી સંખ્યામાં સ્થાનિક રહીશો, ખાસ કરીને મહિલાઓ, બેનરો અને પોસ્ટરો સાથે રસ્તા પર ઉતરી આવ્યા હતા. "અમારી એક જ માંગ, ઘનશ્યામસિંહ જાડેજા"ના સૂત્રોચ્ચાર સાથે સમગ્ર વિસ્તાર ગુંજી ઉઠ્યો હતો. મહિલાઓએ હાથમાં પોસ્ટરો લઈને પૂર્વ કોર્પોરેટર પ્રત્યે પોતાની સંવેદના અને સમર્થન વ્યક્ત કર્યું હતું, જેના કારણે રાજકીય વર્તુળોમાં આ વિરોધ ચર્ચાનો વિષય બન્યો છે.હસનવાડી સોસાયટીના આગેવાન

લોકપ્રિયતા અને સેવાના કામો બન્યા સમર્થનનું કારણ
હસનવાડી સોસાયટીના આગેવાને આ વિરોધ પ્રદર્શન દરમિયાન સ્પષ્ટપણે જણાવ્યું હતું કે, તેઓ કોઈ પક્ષના વિરોધી નથી, પરંતુ કામ કરનારા નેતાના પક્ષધર છે. લોકોના મતે ઘનશ્યામસિંહ જાડેજાએ ગત કાર્યકાળ દરમિયાન પાણી, ગટર, અને રસ્તાઓ જેવી પાયાની સુવિધાઓ માટે અભૂતપૂર્વ કામગીરી કરી છે. આ ઉપરાંત, આયુષ્માન કાર્ડ જેવી સરકારી યોજનાઓનો લાભ ગરીબ અને મધ્યમ વર્ગના લોકો સુધી પહોંચાડવામાં તેમનો ફાળો મહત્વનો રહ્યો છે. જ્યારે પાયાના પ્રશ્નો ઉકેલનાર નેતાની ટિકિટ કાપવામાં આવે છે, ત્યારે જનતામાં સ્વાભાવિક રીતે અસંતોષ ફેલાય છે. સ્થાનિકોએ સવાલ ઉઠાવ્યો હતો કે જનહિતમાં આટલા સારા કામો કર્યા હોવા છતાં તેમનું નામ યાદીમાંથી કેમ બાકાત રાખવામાં આવ્યું?

રાજકોટના રાજકારણમાં અત્યારે સૌથી મોટો સવાલ એ ઉઠી રહ્યો છે કે આ વિરોધ ખરેખર લોકોનો સ્વયંભૂ આક્રોશ છે કે પછી તેની પાછળ કોઈ રાજકીય ગણતરી રહેલી છે. જોકે, સ્થળ પર હાજર મહિલાઓ અને વડીલોના જુસ્સાને જોતા એવું લાગી રહ્યું છે કે ઘનશ્યામસિંહ જાડેજાએ લોકોના હૃદયમાં સ્થાન જમાવ્યું છે. સ્થાનિકોએ ચીમકી ઉચ્ચારી છે કે જો તેમની માંગણી સંતોષવામાં નહીં આવે તો આગામી દિવસોમાં આ આંદોલન વધુ ઉગ્ર બનશે. પક્ષ દ્વારા લેવાયેલા આ નિર્ણય સામે જનતાએ જે રીતે મોરચો માંડ્યો છે, તે જોતા વોર્ડ નંબર 17માં આગામી સમયમાં નવા સમીકરણો રચાય તેવી પૂરેપૂરી શક્યતા છે.