ગુજરાતનું રાજકારણ અત્યારે પક્ષપલટા અને વ્યૂહાત્મક ઉથલપાથલના દોરમાંથી પસાર થઈ રહ્યું છે, જેમાં આજે એક મહત્વપૂર્ણ વળાંક આવ્યો છે. આમ આદમી પાર્ટીના પૂર્વ દિગ્ગજ નેતા અને જાણીતા ખેડૂત અગ્રણી રાજુ કરપડા આજે ભારતીય જનતા પાર્ટીમાં જોડાવા જઈ રહ્યા છે. આજે 9 એપ્રિલના રોજ બપોરે 12:30 વાગ્યે ગાંધીનગર સ્થિત ભાજપના પ્રદેશ કાર્યાલય ‘કમલમ’ ખાતે કાર્યક્રમનું આયોજન કરવામાં આવ્યું છે. રાજુ કરપડા ગાંધીનગર પહોંચશે, જ્યાં ભાજપના નેતાઓની ઉપસ્થિતિમાં તેઓ કેસરિયો ખેસ ધારણ કરી પક્ષમાં પ્રવેશ કરશે. આ પ્રવેશ માત્ર એક વ્યક્તિગત ફેરફાર નથી, પરંતુ સુરેન્દ્રનગર જિલ્લાના સ્થાનિક રાજકારણમાં ભાજપની પકડ વધુ મજબૂત કરવાની એક સોગઠી માનવામાં આવી રહી છે.

શક્તિ પ્રદર્શન અને ચૂંટણી ગણિત
રાજુ કરપડાનું ભાજપમાં આગમન એક મોટા શક્તિ પ્રદર્શન સમાન બની રહેશે. લાંબા સમયથી ખેડૂતોના પ્રશ્નો માટે લડત ચલાવતા કરપડાએ થોડા સમય પહેલા જ 'આપ'માંથી રાજીનામું આપ્યું હતું, ત્યારથી જ તેઓ ભાજપમાં જોડાશે તેવી અટકળો તેજ બની હતી. રાજકીય વર્તુળોમાં ચર્ચાઈ રહ્યું છે કે ભાજપ તેમને આગામી સ્થાનિક સ્વરાજની ચૂંટણીમાં સુરેન્દ્રનગર જિલ્લા પંચાયતની મૂળી બેઠક પરથી ઉમેદવાર તરીકે મેદાનમાં ઉતારી શકે છે. 

ઉમેદવારોની યાદી અને રાજકીય માહોલ
બીજી તરફ, સ્થાનિક સ્વરાજની આ ચૂંટણી જંગ જીતવા માટે તમામ પક્ષોએ કમર કસી છે. આમ આદમી પાર્ટીએ આજે પોતાના ઉમેદવારોની આઠમી યાદી જાહેર કરી દીધી છે, જેમાં યુવાનો અને મહિલાઓને પ્રાધાન્ય આપવામાં આવ્યું છે. આ દરમિયાન સમાચાર મળી રહ્યા છે કે ભાજપ આજે પોતાની પ્રથમ યાદી અને કોંગ્રેસ પોતાની બીજી યાદી જાહેર કરી શકે છે. જ્યારે રાજકીય પક્ષો ઉમેદવારોની પસંદગીમાં વ્યસ્ત છે, ત્યારે રાજુ કરપડા જેવા નેતાનું ભાજપમાં જોડાવું એ વિપક્ષ માટે મોટો ફટકો સાબિત થઈ શકે છે. ખાસ કરીને સુરેન્દ્રનગર જેવા સંવેદનશીલ જિલ્લામાં ખેડૂતોનો સાથ મેળવવા માટે ભાજપે આ માસ્ટરસ્ટ્રોક ખેલ્યો હોય તેમ જણાય છે. હવે જોવાનું એ રહેશે કે આ નવા સમીકરણો આગામી ચૂંટણીના પરિણામોમાં કેટલું પરિવર્તન લાવે છે.