દેશના કરોડો લોન ધારકો માટે રાહતના સમાચાર સામે આવ્યા છે. ભારતીય રિઝર્વ બેંક (RBI) એ બેંકિંગ વ્યવહારોમાં વધુ પારદર્શકતા લાવવા અને ગ્રાહકોના હિતોનું રક્ષણ કરવા માટે નવા દિશાનિર્દેશો જાહેર કર્યા છે. આ ફેરફારોથી સામાન્ય માણસને લોનની ચુકવણી અને ક્રેડિટ પ્રોફાઇલ જાળવવામાં મોટી સુવિધા મળશે.

હવે દર 7 દિવસે અપડેટ થશે તમારો CIBIL સ્કોર

નવા નિયમો મુજબ, 1 એપ્રિલ, 2026 થી ક્રેડિટ સ્કોર અપડેટ કરવાની પ્રક્રિયા ઝડપી બનશે. અત્યાર સુધી ગ્રાહકોએ તેમનો CIBIL સ્કોર અપડેટ થાય તે માટે આખા મહિનાની રાહ જોવી પડતી હતી, પરંતુ હવે તે દર સાત દિવસે અપડેટ થશે. તમારો ક્રેડિટ ડેટા હવે મહિનાની 7, 14, 21 અને 28 તારીખે રિફ્રેશ કરવામાં આવશે. આ ફેરફારથી સમયસર હપ્તા ભરનારા ગ્રાહકોને તાત્કાલિક ફાયદો મળશે, જ્યારે પેમેન્ટમાં વિલંબ કરનારાઓની પ્રોફાઇલ પર પણ તેની ઝડપી અસર દેખાશે.

લોન પ્રીપેમેન્ટ ચાર્જમાંથી મુક્તિ

સમય મર્યાદા પહેલા લોન ભરપાઈ કરવા માંગતા લોકો માટે RBI એ મોટો નિર્ણય લીધો છે. હવેથી ફ્લોટિંગ વ્યાજ દર ધરાવતી Home Loan, Car Loan, Personal Loan અને Education Loan પર કોઈ પણ પ્રકારનો પ્રીપેમેન્ટ અથવા ફોરક્લોઝર ચાર્જ વસૂલવામાં આવશે નહીં. અગાઉ પોતાની બચતમાંથી લોન વહેલી બંધ કરવા પર બેંકો દંડ કે ફી વસૂલતી હતી, જે હવે ભૂતકાળ બની જશે.

નોમિનેશન અને ગોલ્ડ લોનમાં સુધારો

બેંકિંગ ગ્રાહકોની સુવિધા માટે અન્ય બે મહત્વના ફેરફારો પણ કરવામાં આવ્યા છે:

4 નોમિનીની સુવિધા: હવે ગ્રાહકો પોતાના બેંક ખાતા અને લોકરમાં મહત્તમ 4 વ્યક્તિઓને વારસદાર (Nominee) તરીકે ઉમેરી શકશે, જેથી આકસ્મિક સંજોગોમાં સંપત્તિનું સંચાલન સરળ બને.

ગોલ્ડ મેટલ લોન: જ્વેલરીના વેપારીઓ માટે લોન પરત કરવાનો સમયગાળો 180 દિવસથી વધારીને 270 દિવસ કરવામાં આવ્યો છે.

આ નવા નિયમો બેંક અને ગ્રાહક વચ્ચેના વિશ્વાસને વધુ મજબૂત બનાવશે અને પર્સનલ ફાઇનાન્સના વ્યવહારોને વધુ સરળ બનાવશે.