ભારતીય સ્માર્ટફોન માર્કેટમાં આજે રિયલમી એક મોટો ધડાકો કરવા જઈ રહ્યું છે. રિયલમી તેની લોકપ્રિય 'નંબર સિરીઝ' અંતર્ગત નવો સ્માર્ટફોન Realme 16 5G આજે બપોરે 12 વાગ્યે સત્તાવાર રીતે લોન્ચ કરશે. આ ફોનની સૌથી મોટી વિશેષતા તેનું 'સેલ્ફી મિરર' ફિચર છે, જે તેને ભારતનો આવો પ્રથમ ફોન બનાવે છે. કંપનીએ તેના સત્તાવાર પોર્ટલ પર આ વિશેષતાની પુષ્ટિ કરી છે, જેમાં ફોનના પાછળના ભાગમાં કેમેરાની બાજુમાં એક નાનો ગોળ રિફ્લેક્ટિવ ગ્લાસ એટલે કે અરીસો લગાવવામાં આવ્યો છે. આ અરીસાની મદદથી યુઝર્સ પાછળના હાઈ-રિઝોલ્યુશન કેમેરાનો ઉપયોગ કરીને ચોકસાઈ સાથે શાનદાર સેલ્ફી લઈ શકશે, કારણ કે તેઓ અરીસામાં પોતાની પોઝિશન અને એન્ગલ જોઈ શકશે.

ટેકનિકલ સ્પેસિફિકેશન્સની વાત કરીએ તો, Realme 16 5G માં 6.57 ઇંચની મોટી અને આકર્ષક ડિસ્પ્લે આપવામાં આવી છે. ફોનની મજબૂતી પર પણ ખાસ ધ્યાન આપવામાં આવ્યું છે, જેમાં IP69 રેટિંગ ઉપલબ્ધ છે. આ રેટિંગને કારણે ફોન ધૂળ અને પાણી સામે રક્ષણ મેળવે છે, જેનાથી તે દરેક પ્રકારના હવામાનમાં સુરક્ષિત રહે છે. આ સિવાય ફોનનો કેમેરા સેટઅપ ખૂબ જ પ્રભાવશાળી છે, જેમાં પાછળના ભાગમાં ટ્રિપલ કેમેરા સેટઅપ છે. મુખ્ય કેમેરો 50MPનો છે અને આશ્ચર્યજનક રીતે ફ્રન્ટમાં પણ 50MP નો જ પાવરફુલ સેલ્ફી કેમેરો આપવામાં આવ્યો છે. કંપનીનો દાવો છે કે આ ડ્યુઅલ 50MP પોટ્રેટ કેમેરા યુઝર્સને પ્રોફેશનલ ફોટોગ્રાફીનો અનુભવ કરાવશે.

બેટરી બેકઅપના મામલે આ હેન્ડસેટ લાંબો સાથ આપનારો સાબિત થશે, કારણ કે તેમાં 7000mAhની વિશાળ બેટરી આપવામાં આવી છે. કંપનીનો દાવો છે કે એકવાર ચાર્જ કર્યા પછી આ બેટરી સતત 2 દિવસ સુધી ચાલી શકે છે. જોકે, ફાસ્ટ ચાર્જિંગની ક્ષમતા વિશે વિગતો લોન્ચિંગ દરમિયાન જ જાહેર કરવામાં આવશે. કિંમતની વાત કરીએ તો, અહેવાલો અનુસાર, Realme 16 5Gની ભારતમાં કિંમત 25,000 થી 30,000 રૂપિયાની આસપાસ હોઈ શકે છે. આ સાથે જ કંપની લોન્ચિંગ સમયે વિવિધ બેંક ઓફર્સ અને ડિસ્કાઉન્ટની પણ જાહેરાત કરી શકે છે. ફોનમાં કયો પ્રોસેસર વપરાયો છે અને રેમ-સ્ટોરેજના કેટલા વેરિઅન્ટ હશે, તેની સત્તાવાર માહિતી પણ આજના લોન્ચિંગ ઇવેન્ટમાં જ સામે આવશે.