પાટણ જિલ્લાના ચાણસ્મા પંથકમાં રામાધણી ફાર્મહાઉસ પર થયેલા હુમલા બાદ સર્જાયેલા તણાવે કાયદો અને વ્યવસ્થાની સ્થિતિ સામે પડકાર ઊભો કર્યો છે. પોલીસ કાર્યવાહી અને સામાજિક સંગઠનોના વિરોધ પ્રદર્શનની ચીમકીને જોતા જિલ્લામાં અજંપાભરી સ્થિતિ પ્રવર્તી રહી છે, જેના પગલે પ્રશાસન દ્વારા સુરક્ષા વ્યવસ્થા વધુ સખત બનાવવામાં આવી છે.

પાટણના ઝીલિયા ગામે બનેલી હિંસક ઘટનાના ઘેરા પ્રત્યાઘાતો પડ્યા છે. સ્થિતિ વધુ ન વણસે તે માટે જિલ્લા પ્રશાસને તાત્કાલિક અસરથી સમગ્ર જિલ્લામાં પ્રતિબંધાત્મક આદેશો જારી કર્યા છે. અધિક જિલ્લા મેજિસ્ટ્રેટ દ્વારા ભારતીય નાગરિક સુરક્ષા સંહિતાની કલમ 163 (અગાઉની કલમ 144) હેઠળ જાહેરનામું બહાર પાડવામાં આવ્યું છે.

જાહેરનામાની મુખ્ય વિગતો:

એકત્રીકરણ પર પ્રતિબંધ: જિલ્લામાં કોઈપણ સ્થળે 4 થી વધુ વ્યક્તિઓ એકઠા થઈ શકશે નહીં.

સભા-સરઘસ પર રોક: કોઈપણ પ્રકારની જાહેર સભા, રેલી કે સરઘસ યોજવા પર સંપૂર્ણ પ્રતિબંધ મૂકવામાં આવ્યો છે.

સમયગાળો: આ આદેશો 23 માર્ચ 2026 ના રોજ સંપૂર્ણ 24 કલાક માટે અમલમાં રહેશે.

કેમ લેવાયો આ નિર્ણય?

ઝીલિયાની ઘટના બાદ પોલીસની તપાસ અને ધરપકડના વિરોધમાં કેટલાક સંગઠનો, ખાસ કરીને યુવા ક્ષત્રિય સેના દ્વારા આંદોલન કરવાની ચીમકી આપવામાં આવી હતી. સોશિયલ મીડિયા અને સંગઠનોના આક્રમક વલણને જોતા પોલીસ અધિક્ષકની ભલામણ બાદ શાંતિ અને સુલેહ જળવાઈ રહે તે હેતુથી આ કડક પગલું લેવાયું છે.

કયા કિસ્સામાં મળશે છૂટછાટ?

તંત્રએ સ્પષ્ટ કર્યું છે કે સામાન્ય જનજીવનને ઓછી તકલીફ પડે તે માટે ચોક્કસ કિસ્સાઓમાં છૂટછાટ અપાશે. જેમાં લગ્ન પ્રસંગ કે અંતિમવિધિ જેવા સામાજિક પ્રસંગો માટે પૂર્વ મંજૂરી સાથે લોકો એકત્ર થઈ શકશે. સરકારી ફરજ પર તૈનાત કર્મચારીઓ અને સુરક્ષાકર્મીઓને આ આદેશ લાગુ પડશે નહીં.

પ્રશાસને તાકીદ કરી છે કે આ જાહેરનામાનો ભંગ કરનાર સામે કાયદેસરની કડક કાર્યવાહી કરવામાં આવશે. હાલમાં સમગ્ર જિલ્લામાં ચુસ્ત પોલીસ બંદોબસ્ત ગોઠવી દેવામાં આવ્યો છે.