વૈશ્વિક તેલ અને ગેસના 20 ટકા પુરવઠા માટે જવાબદાર એવા અત્યંત 'હોર્મુઝ સ્ટ્રેટ' માંથી જહાજોનો સુરક્ષિત માર્ગ સુનિશ્ચિત કરવાના આંતરરાષ્ટ્રીય પ્રયાસો વધુ તેજ બન્યા છે. ખાડી વિસ્તારમાં વધતા તણાવ વચ્ચે હવે દક્ષિણ કોરિયાએ પણ આ જળમાર્ગને સુરક્ષિત રાખવા અને ઈરાનની ગતિવિધિઓનો વિરોધ કરવા માટે બ્રિટન અને જાપાન સહિતના 7 દેશોના સમૂહમાં જોડાવાની સત્તાવાર જાહેરાત કરી છે.

દક્ષિણ કોરિયાના વિદેશ મંત્રાલયની સત્તાવાર જાહેરાત 

દક્ષિણ કોરિયાના વિદેશ મંત્રાલય દ્વારા સ્પષ્ટ કરવામાં આવ્યું છે કે, તેઓ હોર્મુઝ સ્ટ્રેટમાંથી સુરક્ષિત માર્ગ સુનિશ્ચિત કરવાના આંતરરાષ્ટ્રીય પ્રયાસોમાં જોડાવા માટે સંપૂર્ણપણે તૈયાર છે. દક્ષિણ કોરિયા યુરોપિયન રાષ્ટ્રો અને જાપાન સહિત કુલ 7 દેશો સાથે મળીને આ દિશામાં કામ કરશે. આ દેશોના સંયુક્ત નિવેદનમાં ખાડી વિસ્તારમાં ઈરાન દ્વારા કરવામાં આવતા હુમલાઓ અને હોર્મુઝ સ્ટ્રેટને વાસ્તવિક રીતે બંધ કરવાના પ્રયાસોની સખત નિંદા કરવામાં આવશે.

7 દેશોએ સંયુક્ત નિવેદન દ્વારા ઈરાનને આપી ચેતવણી 

આ આંતરરાષ્ટ્રીય ગઠબંધનમાં બ્રિટન, ફ્રાન્સ, જર્મની, ઇટાલી, જાપાન, નેધરલેન્ડ અને કેનેડાનો સમાવેશ થાય છે. આ તમામ 7 દેશો દ્વારા અગાઉ એક સંયુક્ત નિવેદન જારી કરવામાં આવ્યું છે, જેમાં ઈરાનને સ્પષ્ટ શબ્દોમાં ચેતવણી આપવામાં આવી છે. આ નિવેદનમાં ઈરાનને ખાડી વિસ્તારમાં તેના હુમલાઓ તાત્કાલિક ધોરણે બંધ કરવા અને આ વ્યૂહાત્મક જળમાર્ગને અવરોધિત કરવાના તમામ પ્રયાસો પડતા મૂકવા હાકલ કરવામાં આવી છે.

નેવિગેશનની સ્વતંત્રતા જાળવી રાખવા પર વિશેષ ભાર 

આંતરરાષ્ટ્રીય વેપાર માટે હોર્મુઝ સ્ટ્રેટનું મહત્વ જોતા, ગઠબંધન રાષ્ટ્રોએ નેવિગેશનની સ્વતંત્રતાના સિદ્ધાંતનું પાલન કરવા પર વિશેષ ભાર મૂક્યો છે. દુનિયાના 20 ટકા તેલ અને ગેસનો પુરવઠો આ જળમાર્ગ પર નિર્ભર હોવાથી, તેને વ્યવપાર માટે ખુલ્લો અને સુરક્ષિત રાખવો વૈશ્વિક અર્થતંત્ર માટે અત્યંત જરૂરી છે.