ઇન્ડિયન પ્રીમિયર લીગની 19મી સીઝનનો પ્રારંભ રોયલ ચેલેન્જર્સ બેંગલુરુ  માટે શાનદાર રહ્યો છે. શનિવારે રમાયેલા ઉદ્ઘાટન મુકાબલામાં ડિફેન્ડિંગ ચેમ્પિયન RCBએ સનરાઈઝર્સ હૈદરાબાદને 6 વિકેટે હરાવીને ટૂર્નામેન્ટમાં વિજયી શ્રીગણેશ કર્યા છે. ટોસ જીતીને પ્રથમ ફિલ્ડિંગ પસંદ કરનાર RCBએ હૈદરાબાદના 202 રનના વિશાળ લક્ષ્યાંકને માત્ર 15.4 ઓવરમાં જ પાર પાડી દીધો હતો. પ્રથમ બેટિંગ કરતા સનરાઈઝર્સ હૈદરાબાદે 20 ઓવરમાં 9 વિકેટના નુકસાન પર 201 રનનો પહાડ જેવો સ્કોર ઉભો કર્યો હતો.

હૈદરાબાદ તરફથી કેપ્ટન ઈશાન કિશને આક્રમક બેટિંગ કરતા માત્ર 38 બોલમાં 80 રન ફટકાર્યા હતા, જેમાં 8 ચોગ્ગા અને 5 છગ્ગા સામેલ હતા. અંતિમ ઓવરોમાં અનિકેત વર્માએ 18 બોલમાં 43 રન ફટકારી ટીમને 200 રનનો આંકડો વટાવવામાં મદદ કરી હતી. RCB માટે આ મેચમાં ડેબ્યૂ કરનાર ફાસ્ટ બોલર જેકબ ડફીએ તરખાટ મચાવ્યો હતો. તેણે હૈદરાબાદના ટોપ ઓર્ડરને હચમચાવી નાખતા ૩ મહત્વની વિકેટો ઝડપી હતી. તેની સાથે રોમારિયો શેફર્ડે પણ ૩ વિકેટ લઈને હૈદરાબાદની રનગતિ પર અંકુશ રાખવાનો પ્રયાસ કર્યો હતો.

લક્ષ્યાંકનો પીછો કરવા ઉતરેલી RCBની શરૂઆત નબળી રહી હતી, પરંતુ વિરાટ કોહલી અને ઇમ્પેક્ટ પ્લેયર તરીકે આવેલા દેવદત્ત પડિક્કલે બાજી સંભાળી હતી. બંને વચ્ચે બીજી વિકેટ માટે 101 રનની તોફાની ભાગીદારી થઈ હતી. પડિક્કલે માત્ર 26 બોલમાં 7 ચોગ્ગા અને 4 છગ્ગાની મદદથી 61 રન ફટકારી પ્રેક્ષકોને મંત્રમુગ્ધ કરી દીધા હતા. કિંગ કોહલીએ એક છેડો સાચવી રાખીને પોતાની ક્લાસિક બેટિંગનો નમૂનો પેશ કર્યો હતો. કોહલીએ 69 રનની અણનમ ઈનિંગ રમીને ટીમને જીત સુધી પહોંચાડી હતી. તેની આ ઈનિંગમાં અનુભવ અને આક્રમકતાનો અદભૂત સમન્વય જોવા મળ્યો હતો.

ડેવિડ પેને સતત બે બોલમાં પાટીદાર અને જિતેશ શર્માને આઉટ કરીને વાપસીનો પ્રયાસ કર્યો હતો, પરંતુ કોહલી અને ટિમ ડેવિડે વધુ કોઈ નુકસાન થવા દીધું નહોતું.આ મેચમાં RCBએ IPL ઇતિહાસમાં પોતાના સર્વોચ્ચ 10 ઓવરના સ્કોર્સની યાદીમાં નવું સ્થાન મેળવ્યું છે. બેંગલુરુના એમ. ચિન્નાસ્વામી સ્ટેડિયમમાં રમાયેલી આ હાઈ-વોલ્ટેજ મેચમાં બેટ્સમેનોનો દબદબો રહ્યો હતો. RCBએ બેટિંગ અને બોલિંગ બંને ક્ષેત્રે સંતુલિત પ્રદર્શન કરીને સાબિત કર્યું કે તેઓ આ સીઝનમાં પણ ટાઈટલ જાળવી રાખવા માટે પ્રબળ દાવેદાર છે.