પંજાબી મ્યુઝિક ઈન્ડસ્ટ્રીની જાણીતી ગાયિકા સુનંદા શર્મા ગાઝિયાબાદમાં એક મોટા શો માટે પહોંચી હતી. હજારોની સંખ્યામાં ચાહકો તેમને સાંભળવા માટે ઉમટી પડ્યા હતા. શરૂઆતમાં શો ખૂબ જ ઉત્સાહપૂર્વક ચાલી રહ્યો હતો, પરંતુ અચાનક એક અપ્રિય ઘટનાએ આખા કાર્યક્રમનો માહોલ બગાડી નાખ્યો હતો.પર્ફોર્મન્સ દરમિયાન ભીડમાંથી એક શખ્સ સુરક્ષા ઘેરો તોડીને સીધો સ્ટેજ પર ચઢી આવ્યો હતો. આ ચાહકે સુનંદા શર્માને બળજબરીથી પોતાની પાસે બોલાવવાનો પ્રયાસ કર્યો હતો.એટલું જ નહીં, તેણે ગાયિકાની નજીક જઈને તેમના પર જોરજોરથી બૂમો પાડવાનું શરૂ કર્યું હતું.

સુનંદા શર્મા અત્યંત અસહજ અને ભયભીત થઈ ગઈ હતી, આ ઘટનાએ આયોજકો દ્વારા કરવામાં આવેલી સુરક્ષા વ્યવસ્થા પર મોટા સવાલો ઉભા કર્યા છે. હજારો લોકોની હાજરીમાં કોઈ અજાણ્યો વ્યક્તિ આટલી સરળતાથી સ્ટેજ પર કેવી રીતે પહોંચી શકે, તે ચર્ચાનો વિષય બન્યો છે. સિંગરની અત્યંત નજીક જઈને બૂમાબૂમ કરવી એ કલાકારની વ્યક્તિગત સુરક્ષા માટે મોટો ખતરો ગણાય છે. આ ગેરવર્તણૂક બાદ સુનંદા શર્માએ સખત વલણ અપનાવ્યું હતું. તેમણે માઈક પર જ અસંતોષ વ્યક્ત કર્યો અને જણાવ્યું કે જો કલાકારનું સન્માન અને સુરક્ષા ન જળવાય તો તે પરફોર્મન્સ આપી શકશે નહીં.

તેમણે તાત્કાલિક અસરથી શો રદ કરવાની જાહેરાત કરી અને સ્ટેજ છોડીને જતી રહી હતી, જેના કારણે દૂર-દૂરથી આવેલા ચાહકો નિરાશ થયા હતા. આ ઘટનાનો વીડિયો સોશિયલ મીડિયા પર ઝડપથી વાયરલ થઈ રહ્યો છે. મ્યુઝિક ઈન્ડસ્ટ્રીના અન્ય કલાકારો અને નેટીઝન્સ સુનંદા શર્માના સમર્થનમાં આવ્યા છે. લોકોનું કહેવું છે કે ચાહકોએ તેમની મર્યાદા જાણવી જોઈએ અને કોઈ પણ કલાકાર સાથે આવું વર્તન અસ્વીકાર્ય છે.

ઘણા લોકોએ આયોજકો સામે પગલાં લેવાની પણ માંગ કરી છે. સેલિબ્રિટીઝ સાથે લાઈવ શો દરમિયાન થતા આવા દુર્વ્યવહારના કિસ્સાઓ વધી રહ્યા છે. સુનંદા શર્માની આ ઘટના બાદ ફરી એકવાર લાઈવ ઈવેન્ટ્સમાં ફિમેલ આર્ટિસ્ટની સુરક્ષા માટે કડક પ્રોટોકોલ બનાવવાની જરૂરિયાત પર ભાર મુકવામાં આવ્યો છે. હાલમાં આ મામલે પોલીસ ફરિયાદ કે આયોજકો તરફથી કોઈ સત્તાવાર નિવેદન આવ્યું છે કે કેમ તેની તપાસ ચાલી રહી છે.