સુરત સાયબર ક્રાઈમ સેલને આંતરરાષ્ટ્રીય સ્તરે ચાલતા સાયબર ફ્રોડના મોટા રેકેટનો પર્દાફાશ કરવામાં અભૂતપૂર્વ સફળતા મળી છે. છેલ્લા દોઢ વર્ષથી પોલીસને થાપ આપી રહેલા કુખ્યાત 'મિલન દરજી ગેંગ'ના બે મુખ્ય સાગરીતો, મયુર ઉર્ફે બેરીયો કાકડીયા અને વિશાલ ઉર્ફે ગોળી ગોધાણીની ટેકનિકલ સર્વેલન્સના આધારે ધરપકડ કરવામાં આવી છે.

આ ગેંગ માત્ર ભારત પૂરતી મર્યાદિત નથી, પરંતુ દુબઈમાં બેઠા-બેઠા ચાઈનીઝ ઠગ ટોળકીઓ સાથે મળીને આખા દેશમાં કરોડો રૂપિયાનું ડિજિટલ કૌભાંડ આચરતી હતી. પકડાયેલા આરોપીઓ પૈકી મયુર કાકડીયા સીધો મિલન દરજી સાથે સંપર્કમાં હતો અને દુબઈમાં રહીને ભારતીય બેંક એકાઉન્ટના ATM કાર્ડ દ્વારા વિદેશી ચલણ ઉપાડવાનું કામ કરતો હતો, જે બાદમાં હવાલા મારફતે ગેંગના મુખ્ય સૂત્રધાર સુધી પહોંચાડવામાં આવતું હતું.

આ ગેંગના ઓપરેશનની પદ્ધતિ અત્યંત જટિલ અને વ્યવસ્થિત હતી, જેમાં સુરતના મોટા વરાછા વિસ્તારમાં ઓફિસ રાખીને આખું નેટવર્ક ચલાવવામાં આવતું હતું. ધરપકડ કરાયેલ વિશાલ ગોધાણી સુરતમાં રહીને સ્થાનિક લોકો પાસેથી કમિશનની લાલચ આપી બેંક એકાઉન્ટની કીટો મેળવતો હતો અને તે આગળ અજય ઈટાલિયા જેવા સાગરીતોને પૂરી પાડતો હતો. આ ડમી એકાઉન્ટ્સનો ઉપયોગ ટાસ્ક ફ્રોડ અને ઇન્વેસ્ટમેન્ટ સ્કેમ દ્વારા લોકોના નાણાં પડાવવા માટે કરવામાં આવતો હતો. સાયબર સેલે જ્યારે આરોપીઓના રહેઠાણ અને ઓફિસ પર દરોડા પાડ્યા ત્યારે ત્યાંથી ટેકનોલોજીનો મોટો ખજાનો મળી આવ્યો હતો, જેમાં 28 મોબાઈલ ફોન, 86 ડેબિટ કાર્ડ, 180 પાસબુક અને 258 જેટલા સિમકાર્ડ સહિત અન્ય ઈલેક્ટ્રોનિક ગેજેટ્સ જપ્ત કરવામાં આવ્યા હતા. મળતી માહિતી મુજબ, મિલન દરજી ગેંગ વિરુદ્ધ અગાઉ સુરતમાં સંગઠિત ગુનાખોરી વિરોધી કાયદો એટલે કે GCTOC હેઠળ પણ ગુનો નોંધાઈ ચૂક્યો છે, જે આ ગેંગની ગંભીરતા દર્શાવે છે.

આ ગેંગની ગુનાહિત પ્રવૃત્તિઓની ગંભીરતાને ધ્યાનમાં રાખીને સુરત પોલીસે તેમની વિરુદ્ધ ગુનો દાખલ કર્યો છે. પોલીસ તપાસમાં એવું પણ બહાર આવ્યું છે કે આ ગેંગ કેનેરા બેંક જેવા પ્રતિષ્ઠિત બેંકોના સેંકડો એકાઉન્ટ્સ ઓપરેટ કરતી હતી. અત્યાર સુધીમાં આ કેસમાં અજય ઈટાલિયા અને જલ્પેશ નડીયાદરા સહિત કુલ 14 આરોપીઓની ધરપકડ કરવામાં આવી છે, પરંતુ મુખ્ય સૂત્રધાર મિલન દરજી હજુ પણ દુબઈથી જ પોતાનું સામ્રાજ્ય ચલાવી રહ્યો છે. આ આંતરરાષ્ટ્રીય કનેક્શન ખુલતા હવે ભારતની વિવિધ તપાસ એજન્સીઓ પણ સતર્ક થઈ છે અને આ ગેંગના અન્ય ફરાર સભ્યોને પકડવા માટે ચક્રો ગતિમાન કરવામાં આવ્યા છે.