સુરત જિલ્લામાં દારૂબંધીના કડક અમલ વચ્ચે લોકલ ક્રાઈમ બ્રાન્ચ (LCB)ની ટીમે એક મોટી સફળતા હાંસલ કરી છે. મુંબઈથી દિલ્હીને જોડતા નેશનલ એક્સપ્રેસ હાઇવે નંબર-4 પરથી પસાર થઈ રહેલા એક શંકાસ્પદ ટેમ્પોને આંતરીને પોલીસે લાખોની કિંમતનો વિદેશી દારૂ ઝડપી પાડ્યો છે. હલધરૂ ગામની સીમમાં આવેલી ઉત્તરબુનિયાદી આશ્રમશાળાની સામે ગોઠવાયેલી વોચ દરમિયાન સુરત ગ્રામ્ય LCBએ બાતમી મુજબના અશોક લેલેન્ડ ટેમ્પોને રોક્યો હતો. પ્રાથમિક તપાસમાં ટેમ્પોમાં અન્ય સામાનની આડમાં છુપાવેલો વિદેશી દારૂનો મોટો જથ્થો મળી આવતા પોલીસ પણ ચોંકી ઉઠી હતી. આ સમગ્ર કાર્યવાહીમાં પોલીસે 19.11 લાખથી વધુની કિંમતનો મુદ્દામાલ જપ્ત કરી કાયદેસરની કાર્યવાહી હાથ ધરી છે.

આ ઘટનાની વિગતવાર વિગતો મુજબ, સુરત LCB પોલીસને અગાઉથી જ ચોક્કસ બાતમી મળી હતી કે સુરેન્દ્રનગર પાસિંગનો એક ટેમ્પો (નંબર GJ-14-Z-0016) મોટા પ્રમાણમાં દારૂનો જથ્થો લઈને એક્સપ્રેસ-વે પરથી પસાર થવાનો છે. બાતમીના આધારે હલધરૂ ગામની સીમમાં વ્યૂહાત્મક રીતે વોચ ગોઠવવામાં આવી હતી. જેવો આ ટેમ્પો ત્યાંથી પસાર થયો, પોલીસે તેને ફિલ્મી ઢબે આંતરી લીધો હતો. ટેમ્પોની તલાશી લેતા તેમાંથી 7.83 લાખની કિંમતની વિદેશી દારૂની કુલ 2,832 નાની-મોટી બોટલો મળી આવી હતી. આ દારૂના જથ્થાને છુપાવવા માટે ટેમ્પોમાં 6.19 લાખની કિંમતની એસ મોર્ટર સીલની 500 નંગ બોરીઓ પણ ભરવામાં આવી હતી, જેથી કોઈને શંકા ન જાય. પોલીસે દારૂ, બોરીઓ, ટેમ્પો, મોબાઈલ અને રોકડ રકમ મળીને કુલ 19,11,100 રૂપિયાનો મુદ્દામાલ કબ્જે કર્યો છે.

આ ગેરકાયદેસર હેરાફેરીના મામલે પોલીસે ટેમ્પો ચાલક સંજય વશરામ માધડ (રહે. ડોળીયા ગામ, તા. સાયલા, જી. સુરેન્દ્રનગર)ની સ્થળ પર જ અટકાયત કરી હતી. 25 વર્ષીય ડ્રાઈવર સંજયની પૂછપરછમાં સામે આવ્યું છે કે આ દારૂનો જથ્થો તેના જ ગામના મુકેશ જગા રાઠોડે ભરી આપ્યો હતો. પોલીસે વિવિધ કલમો હેઠળ ગુનો નોંધીને મુખ્ય સૂત્રધાર મુકેશ રાઠોડને વોન્ટેડ જાહેર કર્યો છે. હાલમાં પોલીસ એ દિશામાં તપાસ કરી રહી છે કે આટલી મોટી માત્રામાં દારૂ ક્યાંથી લાવવામાં આવ્યો હતો અને સુરત કે અન્ય કયા વિસ્તારમાં તેની ડિલિવરી કરવાની હતી. એક્સપ્રેસ-વે પર પોલીસની આ તવાઈથી બુટલેગરોમાં ફફડાટ વ્યાપી ગયો છે.