સુરત શહેરના રેલવે સ્ટેશન વિસ્તારમાં નશાના કારોબાર સામે લાલ આંખ કરતા રેલવે SOG (સ્પેશિયલ ઓપરેશન ગ્રુપ)એ એક મોટી સફળતા હાંસલ કરી છે. મળતી વિગતો અનુસાર, સુરત રેલવે સ્ટેશન પાસે આવેલી સ્પીડ પાર્સલ ઓફિસની નજીકથી શંકાસ્પદ હાલતમાં પસાર થઈ રહેલા એક શખ્સની પોલીસે અટકાયત કરી હતી. તલાશી લેતા આ શખ્સ પાસેથી માદક પદાર્થ ગાંજાનો મોટો જથ્થો મળી આવતા પોલીસ પણ ચોંકી ઉઠી હતી. પકડાયેલા આરોપીની ઓળખ નૃશીમા સ્વાઇન તરીકે થઈ છે, જે ગાંજાના જથ્થા સાથે હેરફેર કરવાની પેરવીમાં હતો. રેલવે પોલીસે તાત્કાલિક કાર્યવાહી કરીને આરોપીની ધરપકડ કરી કાયદેસરની તપાસ હાથ ધરી છે.

પોલીસ દ્વારા કરવામાં આવેલી આ કાર્યવાહીમાં આરોપી પાસેથી અંદાજે 8.040 કિલોગ્રામ જેટલો ઉચ્ચ ગુણવત્તાનો ગાંજાનો જથ્થો જપ્ત કરવામાં આવ્યો છે. આ ડ્રગ્સના જથ્થા સાથે અન્ય ચીજવસ્તુઓ મળીને પોલીસે કુલ રૂ. 4,03,200નો મુદ્દામાલ કબજે કર્યો છે. પ્રાથમિક તપાસમાં બહાર આવ્યું છે કે પકડાયેલો આરોપી માત્ર એક પેડલર તરીકે કામ કરતો હતો. રેલવે સ્ટેશન જેવા ગીચ અને વ્યસ્ત વિસ્તારનો ઉપયોગ કરીને નશાની હેરાફેરી કરવાના મનસૂબા પર પોલીસે પાણી ફેરવી દીધું છે.

હાલમાં રેલવે SOG દ્વારા આ નેટવર્કના મૂળ સુધી પહોંચવા માટે ચક્રો ગતિમાન કરવામાં આવ્યા છે. પોલીસ તપાસનો મુખ્ય વિષય એ છે કે આટલી મોટી માત્રામાં ગાંજાનો જથ્થો આરોપીને કોણે પૂરો પાડ્યો હતો અને સુરતમાં આ જથ્થો કોને ડિલિવરી કરવાનો હતો. પોલીસને આશંકા છે કે આમાં કોઈ મોટી આંતરરાજ્ય ગેંગ સામેલ હોઈ શકે છે. આગામી દિવસોમાં આરોપીની સઘન પૂછપરછ દરમિયાન નશાના આ કાળા કારોબાર સાથે જોડાયેલા અન્ય મોટા નામો પણ બહાર આવે તેવી પૂરેપૂરી શક્યતા સેવાઈ રહી છે.