દક્ષિણ ગુજરાતના આર્થિક પાટનગર ગણાતા સુરત શહેરમાં આજે મોડી સાંજે અચાનક જ પેટ્રોલ પંપો પર વાહનોની લાંબી કતારો જોવા મળી હતી. શહેરના વરાછા, કતારગામ, અડાજણ અને મજુરા ગેટ જેવા મુખ્ય વિસ્તારોમાં આવેલા પેટ્રોલ પંપો પર વાહનચાલકોનો ભારે ધસારો જોવા મળતા ટ્રાફિક જામ જેવી સ્થિતિ સર્જાઈ હતી.

સોશિયલ મીડિયા અને સ્થાનિક સ્તરે 'પેટ્રોલનો સ્ટોક પૂરો થઈ જવાનો છે' તેવી પાયાવિહોણી અફવા વાયુવેગે ફેલાઈ હતી. આ અફવાને કારણે લોકોમાં ફફડાટ ફેલાયો હતો અને રાત્રિના સમયે પણ લોકો પોતાના ટુ-વ્હીલર અને ફોર-વ્હીલર લઈને નજીકના પેટ્રોલ પંપ તરફ દોડ્યા હતા.

પેટ્રોલ પુરાવવા માટે આવેલા લોકોએ અડધાથી એક કલાક સુધી લાંબી લાઈનોમાં ઉભા રહેવું પડ્યું હતું. ઓફિસથી ઘરે પરત ફરી રહેલા નોકરિયાત વર્ગ અને સામાન્ય નાગરિકોમાં એવી બીક પેસી ગઈ હતી કે જો આજે પેટ્રોલ નહીં પુરાવે તો આવતીકાલે વાહન ચલાવવું મુશ્કેલ બની જશે.

શહેરના વિવિધ વિસ્તારોમાં પેટ્રોલ પંપ પર એકઠી થયેલી ભીડને કારણે ક્યાંક બોલાચાલી અને ઘર્ષણના દ્રશ્યો પણ સામે આવ્યા હતા. પેટ્રોલ પંપના કર્મચારીઓ લોકોને સમજાવવા છતાં લોકો ટાંકી ફૂલ કરાવવા માટે ઉતાવળા જણાયા હતા, જેના કારણે વ્યવસ્થા જાળવવી મુશ્કેલ બની હતી.

અચાનક સર્જાયેલી આ ભીડને નિયંત્રિત કરવા માટે કેટલાક વિસ્તારોમાં પોલીસ કાફલો પણ પેટ્રોલ પંપ પર પહોંચ્યો હતો. લોકો શાંતિ જાળવે અને અફવાઓ પર ધ્યાન ન આપે તેવી અપીલ કરવામાં આવી હતી, છતાં મોડી રાત સુધી પંપો પર લાઈનો ઘટવાનું નામ લેતી નહોતી.

લાઈનમાં ઉભેલા કેટલાક વાહનચાલકોએ જણાવ્યું હતું કે, તેમને વોટ્સએપ અને અન્ય માધ્યમોથી જાણવા મળ્યું કે આગામી દિવસોમાં પેટ્રોલની અછત સર્જાવાની છે. આ ડરને કારણે તેઓ કામકાજ છોડીને પણ લાઈનમાં ઉભા રહેવા મજબૂર બન્યા છે, જેથી આવતીકાલની અવરજવરમાં કોઈ અડચણ ન આવે.

જોકે, સત્તાવાર સૂત્રો અને પેટ્રોલ પંપ એસોસિએશન દ્વારા એવી સ્પષ્ટતા કરવામાં આવી રહી છે કે શહેરમાં પેટ્રોલ કે ડીઝલની કોઈ અછત નથી. આ માત્ર પાયાવિહોણી અફવા છે અને પૂરતો સ્ટોક ઉપલબ્ધ છે. નાગરિકોને ગભરાયા વગર સંયમ રાખવા અને ખોટી અફવાઓથી દૂર રહેવા વિનંતી કરવામાં આવી છે.