સુરતના ઉદ્યોગ જગતના હૃદય સમાન સચિન GIDC વિસ્તારમાં આજે સવારે એક કાળઝાળ દુર્ઘટના સર્જાઈ હતી. હોજીવાલા ઈન્ડસ્ટ્રીઝમાં આવેલી જાણીતી  'ગોપીનાથ મીટીંગ ' ટેક્સટાઇલ ફેક્ટરીમાં અચાનક આગ ફાટી નીકળતા સમગ્ર ઔદ્યોગિક પટ્ટામાં ભયનો માહોલ વ્યાપી ગયો હતો. સવારના શાંત વાતાવરણમાં અચાનક ઉઠેલી આગની જ્વાળાઓ એટલી પ્રચંડ હતી કે દૂર-દૂર સુધી ધુમાડાના કાળા ગોટેગોટા દેખાવા લાગ્યા હતા. ઘટનાની ગંભીરતા અને આગના વ્યાપને જોતા સુરત ફાયર બ્રિગેડ દ્વારા તાત્કાલિક ધોરણે 'મેજર કોલ' જાહેર કરવામાં આવ્યો હતો, જે આ દુર્ઘટનાની ભયાનકતાનો ચિતાર આપે છે.

આ ભીષણ આગનું મુખ્ય કારણ ફેક્ટરીમાં રહેલો નાયલોન અને ટેક્સટાઇલ કાપડનો જંગી જથ્થો હોવાનું માનવામાં આવે છે. નાયલોન મટીરિયલ અત્યંત જ્વલનશીલ હોવાથી આગે પલકવારમાં આખી ફેક્ટરીને પોતાની લપેટમાં લઈ લીધી હતી. જોતજોતામાં આગે એટલું રૌદ્ર સ્વરૂપ ધારણ કર્યું કે ફેક્ટરીની મશીનરી અને તૈયાર માલ બળીને ખાખ થવા લાગ્યો હતો. ફેક્ટરીમાંથી નીકળતી આગની જ્વાળાઓ જોઈને આસપાસના એકમોમાં કામ કરતા શ્રમિકો અને સ્થાનિક લોકોમાં ભારે નાસભાગ મચી ગઈ હતી. અફરાતફરીના આ માહોલ વચ્ચે લોકો જીવ બચાવવા સુરક્ષિત સ્થળોએ દોડી ગયા હતા, જેના કારણે સમગ્ર વિસ્તારમાં ચીસાચીસ અને હોબાળો મચી ગયો હતો.

ઘટનાની જાણ થતા જ સુરત શહેરના વિવિધ ફાયર સ્ટેશનોમાંથી કાફલો ઘટનાસ્થળે રવાના કરવામાં આવ્યો હતો. સચિન જીઆઈડીસી, હોજીવાલા અને સુરત મેઈન ફાયર સ્ટેશનની 12થી વધુ ફાયર ટેન્કરોની મદદથી ફાયર ફાઈટરોએ આગ પર કાબૂ મેળવવા મોરચો સંભાળ્યો હતો. પાણીનો સતત મારો ચલાવીને આગને વધુ ફેલાતી અટકાવવા માટે ફાયર વિભાગના જવાનો જીવના જોખમે મથામણ કરી રહ્યા છે. ખાસ કરીને આસપાસની અન્ય ફેક્ટરીઓ આ જ્વાળાઓની ઝપેટમાં ન આવે તે માટે 'કુલિંગ' પ્રક્રિયા પર પણ ભાર મૂકવામાં આવી રહ્યો છે. પોલીસ કાફલાએ પણ ઘટનાસ્થળે પહોંચીને લોકોના ટોળાને વિખેર્યા હતા જેથી રાહત કામગીરીમાં કોઈ અવરોધ ન આવે.

હાલના તબક્કે સદનસીબે કોઈ જાનહાનિના અહેવાલ પ્રાપ્ત થયા નથી, જે આટલી મોટી દુર્ઘટનામાં મોટી રાહતની વાત છે. જોકે, આર્થિક દ્રષ્ટિએ ગોપી નિટિંગ ફેક્ટરીને મોટું નુકસાન વેઠવાનો વારો આવ્યો છે. આગ લાગવાનું પ્રાથમિક કારણ શોર્ટ સર્કિટ હોવાની આશંકા વ્યક્ત કરવામાં આવી રહી છે, પરંતુ આગ સંપૂર્ણપણે ઓલવાયા બાદ અને ફાયર વિભાગના નિષ્ણાતોની તપાસ બાદ જ સત્ય બહાર આવશે. અત્યારે તો સમગ્ર તંત્રનું ધ્યાન આગને જલ્દીથી ડામી દેવા પર કેન્દ્રિત છે.