સુરત શહેરના વેસુ વિસ્તારમાં આજે એક હૃદયદ્રાવક ઘટના સામે આવી છે. ભગવાન મહાવીર કોલેજ પાસે આવેલા તળાવમાં માછલી પકડવા ગયેલી એક 11 વર્ષની માસૂમ બાળકી અચાનક ઊંડા પાણીમાં ગરકાવ થઈ ગઈ હતી. ફાયર બ્રિગેડની ટીમે ભારે જહેમત બાદ બાળકીને બહાર કાઢી સિવિલ હોસ્પિટલ પહોંચાડી હતી, પરંતુ ફરજ પરના તબીબોએ તેને મૃત જાહેર કરતા પરિવારમાં માતમ છવાઈ ગયો છે.

માછલી પકડતી વખતે અચાનક સંતુલન ગુમાવ્યું

બનાવની વિગત મુજબ, વેસુ ભગવાન મહાવીર કોલેજ પાસે રહેતી 11 વર્ષની સંજુકુમારી ગોવિંદરા મહારા આજે સવારે 11:15 વાગ્યાના અરસામાં ઘરની નજીક આવેલા તળાવમાં માછલી પકડવા માટે ગઈ હતી. તળાવના કિનારે ઊભી રહીને માછલી પકડતી વખતે અચાનક બાળકીનું સંતુલન બગડતા તે પાણીમાં પડી ગઈ હતી. તળાવમાં પાણીની ઊંડાઈ વધુ હોવાને કારણે તે ગણતરીની સેકન્ડોમાં જ ગરકાવ થઈ ગઈ હતી.

ફાયર બ્રિગેડનું તાત્કાલિક રેસ્ક્યુ ઓપરેશન

બાળકી તળાવમાં ડૂબી રહી હોવાનું સ્થાનિક લોકોના નજરે પડતા તુરંત જ ફાયર કંટ્રોલ વિભાગને જાણ કરવામાં આવી હતી. ઘટનાની ગંભીરતાને જોઈને ભીમરાડ અને વેસુ ફાયર સ્ટેશનથી જવાનોનો કાફલો ઘટનાસ્થળે દોડી આવ્યો હતો. ફાયર બ્રિગેડના જવાનોએ તળાવના પાણીમાં સર્ચ ઓપરેશન હાથ ધરી માસૂમ બાળકીની શોધખોળ કરી હતી. થોડી જ મિનિટોમાં બાળકીને પાણીમાંથી બહાર કાઢી લેવામાં આવી હતી.

સિવિલ હોસ્પિટલમાં તબીબોએ મૃત જાહેર કરી

તળાવમાંથી બહાર કાઢ્યા બાદ બાળકીને બેભાન હાલતમાં જ 108 ઇમરજન્સી એમ્બ્યુલન્સ મારફતે તાત્કાલિક સારવાર માટે સિવિલ હોસ્પિટલ ખસેડવામાં આવી હતી. હોસ્પિટલના ટ્રોમા સેન્ટર ખાતે તબીબોએ બાળકીની પ્રાથમિક તપાસ કરી હતી, પરંતુ કમનસીબે ફેફસામાં પાણી ભરાઈ જવાથી તેનું મૃત્યુ થયું હોવાનું જણાતા તબીબોએ તેને મૃત જાહેર કરી હતી. 11 વર્ષની માસૂમ પુત્રીના મોતના સમાચાર સાંભળતા જ તેના માતા-પિતા પર આભ તૂટી પડ્યું હતું.

પોલીસ દ્વારા તપાસનો ધમધમાટ શરૂ

આ ઘટનાને પગલે સ્થાનિક પોલીસે અકસ્માત મોતનો ગુનો નોંધી કાયદેસરની કાર્યવાહી હાથ ધરી છે. બાળકીના મૃતદેહને પોસ્ટમોર્ટમ માટે મોકલી આપવામાં આવ્યો છે. પોલીસ એ દિશામાં તપાસ કરી રહી છે કે આ ઘટના સમયે બાળકી સાથે અન્ય કોઈ હતું કે કેમ અને તળાવના કિનારે સુરક્ષાની કોઈ વ્યવસ્થા છે કે નહીં.