આગામી 1 મે, 2026ના રોજ જ્યારે સમગ્ર રાજ્ય ગુજરાત સ્થાપના દિવસની ઉજવણીમાં મગ્ન હશે, ત્યારે હીરાનગરી સુરત રાજ્યના ઔદ્યોગિક ઇતિહાસમાં એક નવું સુવર્ણ પ્રકરણ લખવા જઈ રહ્યું છે. પ્રધાનમંત્રી નરેન્દ્ર મોદીના 'વિકસિત ભારત @2047'ના સ્વપ્નને સાકાર કરવાની દિશામાં એક મક્કમ ડગલું માંડતા, મુખ્યમંત્રી ભૂપેન્દ્ર પટેલના નેતૃત્વ હેઠળ સુરત ખાતે બે દિવસીય ‘વાઇબ્રન્ટ ગુજરાત રિજનલ કોન્ફરન્સ’ (VGRC)નું ભવ્ય આયોજન કરવામાં આવ્યું છે. 1 અને 2 મે દરમિયાન યોજાનારી આ કોન્ફરન્સ માત્ર એક સરકારી કાર્યક્રમ બની રહેવાને બદલે દક્ષિણ અને મધ્ય ગુજરાતના ઔદ્યોગિક સિતારાઓને વૈશ્વિક મંચ પૂરો પાડવા માટેનું એક સબળ માધ્યમ બનશે. રાજ્ય સરકારના સંતુલિત પ્રાદેશિક વિકાસના અભિગમને આગળ ધપાવતી આ કોન્ફરન્સમાં દક્ષિણ ગુજરાતના ભરૂચ, ડાંગ, નવસારી, સુરત, તાપી અને વલસાડ તેમજ મધ્ય ગુજરાતના અમદાવાદ, વડોદરા, આણંદ સહિતના કુલ 16 જિલ્લાઓની આર્થિક ક્ષમતાઓને એકતાંતણે બાંધવામાં આવશે.

આ આયોજનની વિશેષતા એ છે કે તે પરંપરાગત ઉદ્યોગોની સાથે ભવિષ્યના ઉભરતા ક્ષેત્રો પર વિશેષ ભાર મૂકે છે. કોન્ફરન્સ દરમિયાન યોજાનારા વિવિધ સેમિનારોમાં રસાયણ, પેટ્રોકેમિકલ્સ અને ટેક્સટાઇલ જેવા પાયાના ઉદ્યોગોથી લઈને ગ્રીન એનર્જી ઇકોસિસ્ટમ, ફિનટેક, એરોસ્પેસ અને સંરક્ષણ જેવા અત્યાધુનિક ક્ષેત્રો પર ઊંડાણપૂર્વક મંથન કરવામાં આવશે. આ મંચ દ્વારા સ્થાનિક લઘુ અને મધ્યમ ઉદ્યોગો (MSME)ને વૈશ્વિક બજારની જરૂરિયાતો સમજવાની અને મોટા રોકાણકારો સાથે સીધો સંવાદ કરવાની તક મળશે. સુરતની આ કોન્ફરન્સમાં જે સફળતાના બીજ રોપાશે અને જે વ્યુહાત્મક રોકાણો આવશે, તેનું પ્રતિબિંબ અને ગુંજ આગામી વાઇબ્રન્ટ ગુજરાત ગ્લોબલ સમિટના મંચ પર પણ સ્પષ્ટપણે જોવા મળશે, જે રાજ્યના આર્થિક પરિદૃશ્યમાં એક સીમાચિહ્નરૂપ સાબિત થશે.

વધારેમાં, રોકાણકારો અને ઉદ્યોગસાહસિકોને પ્રોત્સાહન આપવા માટે અહીં 'વાઇબ્રન્ટ ગુજરાત રિજનલ એક્ઝિબિશન' (VGRE)નું પણ આયોજન કરાયું છે. જેમાં વેન્ડર ડેવલપમેન્ટ પ્રોગ્રામ અને ઇન્ટરનેશનલ રિવર્સ બાયર સેલર મીટ જેવા આકર્ષણો સ્થાનિક ઉદ્યોગસાહસિકોને આંતરરાષ્ટ્રીય સ્તરનું એક્સપોઝર પૂરું પાડશે. ઉલ્લેખનીય છે કે, અગાઉ મહેસાણા અને રાજકોટ ખાતે યોજાયેલી પ્રાદેશિક કોન્ફરન્સમાં જાપાન અને દક્ષિણ કોરિયા જેવા દેશોના સહયોગથી જે સફળતા મળી હતી, તેને જાળવી રાખીને સુરત હવે દક્ષિણ અને મધ્ય ગુજરાતના પાયાના ઉદ્યોગોને સશક્ત બનાવશે. આ કોન્ફરન્સ માત્ર રોકાણ આકર્ષવા પૂરતી મર્યાદિત ન રહેતા, નવીનતા (Innovation)ને પ્રોત્સાહન આપીને સ્થાનિક રોજગારી અને પ્રાદેશિક સમૃદ્ધિના નવા દ્વાર ખોલશે, જે ગુજરાતની વિકાસગાથાને નવી ઊંચાઈઓ પર લઈ જશે.