રમતગમત જગતમાં જ્યારે મોટી ટુર્નામેન્ટો યોજાય છે, ત્યારે ટિકિટોની માંગ આસમાને પહોંચતી હોય છે. આ તકનો લાભ ઉઠાવીને કેટલાક અસામાજિક તત્વો ટિકિટોનો સંગ્રહ કરી તેને ઉંચા ભાવે વેચી 'બ્લેક માર્કેટિંગ' અથવા કાળાબજારી કરતા હોય છે. આ પ્રવૃત્તિ માત્ર કાયદાકીય ગુનો જ નથી, પરંતુ રમતપ્રેમીઓ સાથે છેતરપિંડી પણ છે, જે રમતની ગરિમાને ઠેસ પહોંચાડે છે.

પૂર્વ ક્રિકેટર બન્યો સાતમો આરોપી

તાજેતરમાં રમાયેલા T20 વર્લ્ડકપ-2026 ની સેમિફાઈનલ મેચ (ભારત વિરુદ્ધ ઈંગ્લેન્ડ) દરમિયાન ટિકિટોની કાળાબજારીનો ગંભીર કિસ્સો પ્રકાશમાં આવ્યો છે. મુંબઈ પોલીસે આ રેકેટમાં મોટી કાર્યવાહી કરતા અંડર-19 ના પૂર્વ ક્રિકેટર બલવંત સિંહ સ્વરૂપ સોઢાની ધરપકડ કરી છે. 26 વર્ષીય સોઢા આ કેસમાં પકડાયેલો 7 મો આરોપી છે.

નામનો દુરુપયોગ અને ટિકિટોનું વેચાણ

પોલીસ તપાસમાં બહાર આવ્યું છે કે સોઢાએ અત્યારે રાષ્ટ્રીય સ્તરે રમી રહેલા નામી ક્રિકેટરો સાથે ભૂતકાળમાં મેચ રમી છે. આ ઓળખાણ અને પોતાના નામનો દુરુપયોગ કરીને તે કાળાબજારીની ગેંગમાં સામેલ થયો હતો.

સોઢાએ સેમિફાઈનલની માત્ર 2 ટિકિટો અંદાજે ₹25,000 માં વેચી હોવાનું ખુલ્યું છે.

આટલા ઊંચા ભાવે સામાન્ય નાગરિકોને ટિકિટ પધરાવી તે નફો કમાતો હતો.

પોલીસ તપાસ અને જપ્તી

મુંબઈ પોલીસે આ રેકેટના મૂળ સુધી પહોંચવા માટે સઘન તપાસ શરૂ કરી છે. આરોપી સોઢાનો મોબાઈલ ફોન જપ્ત કરી તેના કોન્ટેક્ટ લિસ્ટની તપાસ કરવામાં આવી રહી છે. અત્યાર સુધીમાં કુલ 24 ટિકિટો પોલીસ દ્વારા જપ્ત કરવામાં આવી છે. મુંબઈ ક્રિકેટ એસોસિએશન (MCA) ને પત્ર લખીને ટિકિટોની વહેંચણી પ્રક્રિયા અંગે જવાબ માંગવામાં આવ્યો છે.

આરોપીએ આટલી મોટી સંખ્યામાં ટિકિટો ક્યાંથી અને કોની મદદથી મેળવી, તે દિશામાં હાલ પોલીસ ઊંડી તપાસ કરી રહી છે. ભારતે આ વર્લ્ડકપની ફાઈનલમાં ન્યૂઝીલેન્ડને હરાવીને ચેમ્પિયનપદ મેળવ્યું હતું, પરંતુ તે પહેલા રમાયેલી સેમિફાઈનલે આ વિવાદ જગાવ્યો છે.