સંજય લીલા ભણશાલીની વેબ સિરીઝ 'હીરામંડી'માં તાજદારના પાત્રથી લાખો દર્શકોના દિલ જીતનાર અભિનેતા તાહા શાહ બદુશા હવે કરણ જોહરની આગામી ફિલ્મમાં મુખ્ય ભૂમિકામાં જોવા મળશે. ધર્મા પ્રોડક્શન હેઠળ બનનારી આ ફિલ્મનું ટાઈટલ 'નજદિકિયાં' રાખવામાં આવ્યું છે. મળતા અહેવાલો અનુસાર, 'નજદિકિયાં' ફિલ્મ એક આધુનિક લવ સ્ટોરી અને રિલેશનશિપ ડ્રામા હશે. આ ફિલ્મમાં આજની પેઢીના યુવાનોના સંબંધો, તેમની મૂંઝવણો અને લાગણીઓને પડદા પર ઉતારવામાં આવશે.

આ ફિલ્મમાં તાહા શાહની સાથે એક ફ્રેશ સ્ટાર કાસ્ટ જોવા મળશે, જોકે ફિલ્મની લીડ એક્ટ્રેસ અંગે હજુ સસ્પેન્સ રાખવામાં આવ્યું છે. તાહા શાહ માટે આ પ્રોજેક્ટ માત્ર એક ફિલ્મ નથી, પરંતુ એક ભાવનાત્મક સફળતા છે. નોંધનીય છે કે તાહાએ પોતાની કારકિર્દીની શરૂઆત પણ ધર્મા પ્રોડક્શનની ફિલ્મ 'ગિપ્પી' થી કરી હતી. હવે વર્ષો બાદ ફરીથી મુખ્ય કલાકાર તરીકે કરણ જોહર સાથે કામ કરવાની તક મળતા તાહાએ તેને પોતાની કારકિર્દીની 'ફુલ-સર્કલ' મોમેન્ટ ગણાવી છે. તાજેતરમાં 'હીરામંડી: ધ ડાયમંડ બાઝાર'માં તેની સાદગી અને દમદાર અભિનયની ભારે પ્રશંસા થઈ હતી.

તે રાતોરાત 'નેશનલ ક્રશ' બની ગયો હતો. આ સફળતા બાદ તેને કરણ જોહર જેવા મોટા નિર્માતાનો સાથ મળતા બોલિવૂડમાં તેનું કદ વધ્યું છે. તાહા શાહે કરણ જોહર સાથે કામ કરવા બદલ ગર્વ અને ઉત્સાહ વ્યક્ત કર્યો છે. સૂત્રોના જણાવ્યા અનુસાર, ફિલ્મનું શૂટિંગ ટૂંક સમયમાં શરૂ થશે અને તેમાં આધુનિક યુગના પ્રેમની એક અલગ જ બાજુ જોવા મળશે.