ઇઝરાયલના વડાપ્રધાન બેન્જામિન નેતન્યાહુએ હોર્મુઝ સ્ટ્રેટમાં ઊભા થયેલા સંકટનો કાયમી ઉકેલ લાવવાનો મોટો પ્લાન જાહેર કર્યો છે. તેમણે કહ્યું છે કે આ સમસ્યાનો લાંબા ગાળાનો હલ નવી એનર્જી પાઇપલાઇન બનાવવામાં છે, જે ખાડી દેશોના તેલ અને ગેસને સઉદી અરબમાંથી પસાર કરીને લાલ સમુદ્ર અને ભૂમધ્ય સમુદ્ર સુધી લઈ જશે.

નેતન્યાહુએ Newsmax સાથેના ઇન્ટરવ્યુમાં કહ્યું, “હોર્મુઝ સ્ટ્રેટને ઇરાને હથિયાર તરીકે વાપર્યું છે. આ સમસ્યાનો સ્થાયી ઉકેલ એ છે કે તેલ-ગેસના પરિવહનનો માર્ગ બદલીને ઇરાનના નિયંત્રણને પૂરેપૂરો બાયપાસ કરવો.”

આ પ્લાન કેવી રીતે કામ કરશે?

હોર્મુઝ સ્ટ્રેટ વિશ્વના કુલ તેલ નિકાસના 20% ભાગનું પરિવહન કરે છે. નેતન્યાહુના પ્લાન મુજબ નવી પાઇપલાઇન સઉદી અરબ, UAE અને અન્ય ખાડી દેશોના તેલને સીધી લાલ સમુદ્ર અને ભૂમધ્ય સમુદ્ર તરફ લઈ જશે. આનાથી ઇરાનના ભૌગોલિક ચેકપોઇન્ટનું મહત્વ પૂરેપૂરું ઘટી જશે.

નેતન્યાહુએ સ્વીકાર્યું કે ઇરાન હોર્મુઝ પર મજબૂત પકડ ધરાવે છે, તેથી સૈન્ય કાર્યવાહી માત્ર અસ્થાયી રાહત આપી શકે છે. કાયમી ઉકેલ માટે આ વૈકલ્પિક માર્ગ જરૂરી છે.

ઇરાન સાથે યુદ્ધની સ્થિતિ

નેતન્યાહુએ દાવો કર્યો કે ઇરાન સાથેનું યુદ્ધ અડધે માર્ગે પહોંચી ગયું છે. ઇઝરાયલે ઇરાનની મિસાઇલ ક્ષમતા અને પરમાણુ કાર્યક્રમને નબળો પાડ્યો છે. તેમણે કહ્યું કે ઇરાનને પરમાણુ હથિયાર બનાવતા અટકાવવામાં આવશે. યાદ રહે કે 28 ફેબ્રુઆરીથી ઇરાન અને ઇઝરાયલ-અમેરિકા વચ્ચે યુદ્ધ ચાલી રહ્યું છે. ઇરાને જવાબમાં હોર્મુઝ સ્ટ્રેટને અવરોધિત કરીને વૈશ્વિક ઊર્જા સપ્લાયને અસર કરી છે.