સિંહ અને અન્ય વન્યજીવોના સંરક્ષણ માટે દિવસ-રાત જંગલના અંતરિયાળ વિસ્તારોમાં ફરજ બજાવતા વન કર્મચારીઓ ઘણીવાર સ્થાનિક તત્વોના રોષનો ભોગ બનતા હોય છે. વન વિભાગના ટ્રેકર્સ અને બીટ ગાર્ડ્સ જ્યારે સિંહના લોકેશન કે વન્યજીવોના અવલોકન માટે ફિલ્ડમાં હોય છે, ત્યારે તેમની સુરક્ષા અત્યંત મહત્વની બની જાય છે.

એશિયાટિક સિંહોના ઘર ગણાતા સાસણ ગીરના જંગલમાં ફરજ બજાવતા વન વિભાગના કર્મચારીને અપશબ્દો બોલી જાનથી મારી નાખવાની ધમકી આપવામાં આવી હોવાની ઘટના પ્રકાશમાં આવી છે. સાસણ વન વિભાગના એક ટ્રેકર દ્વારા સ્થાનિક માલધારી વિરુદ્ધ મેંદરડા પોલીસ સ્ટેશનમાં વિધિવત ફરિયાદ નોંધાવવામાં આવી છે.

ઘટનાની વિગતો

મળતી માહિતી મુજબ, સાસણ અભયારણ્યના ગળકબારી વિસ્તારમાં વન વિભાગના ટ્રેકર તરીકે ફરજ બજાવતા સાગર માંજરીયા વન્યપ્રાણીઓના અવલોકનની નિયમિત કામગીરી કરી રહ્યા હતા. આ દરમિયાન તે વિસ્તારમાં રહેતા હનીફ બ્લોચ નામના માલધારીએ સ્થળ પર આવીને સાગર માંજરીયા સાથે વિવાદ કર્યો હતો. હનીફ બ્લોચે સરકારી કામગીરીમાં અડચણ ઊભી કરી હતી અને વન કર્મચારીને અપશબ્દો કહી જાનથી મારી નાખવાની ધમકી આપી હતી.

પોલીસ કાર્યવાહી

આ ઘટના બાદ વન કર્મચારી સાગર માંજરીયાએ તુરંત ઉચ્ચ અધિકારીઓને જાણ કરી હતી અને મેંદરડા પોલીસ મથકે હનીફ બ્લોચ વિરુદ્ધ ફરિયાદ નોંધાવી હતી. માલધારી સામે સરકારી ફરજમાં રૂકાવટ બદલ ગુનો નોંધવામાં આવ્યો છે. તેમજ આરોપી દ્વારા આપવામાં આવેલી જાનથી મારી નાખવાની ધમકી અંગે તપાસ તેજ કરી છે.

મેંદરડા પોલીસની અલગ-અલગ ટીમો દ્વારા આરોપીને ઝડપી પાડવા ચક્રો ગતિમાન કર્યા છે.