ભૂતપૂર્વ અભિનેત્રી અને જાણીતા ઉદ્યોગપતિ અનિલ અંબાણીના પત્ની ટીના અંબાણી પર દુઃખનો પહાડ તૂટી પડ્યો છે. ટીના અંબાણીની મોટી બહેન ઝરણાનું નિધન થતા સમગ્ર અંબાણી પરિવારમાં માતમ છવાયો છે. પોતાની બહેન સાથે અત્યંત નજીકનું અને પ્રેમભર્યું બંધન ધરાવતી ટીનાએ સોશિયલ મીડિયા પ્લેટફોર્મ ઇન્સ્ટાગ્રામ પર એક અત્યંત ભાવુક પોસ્ટ શેર કરીને પોતાની મોટી બહેનને શ્રદ્ધાંજલિ અર્પી છે અને તેમના આત્માની શાંતિ માટે પ્રાર્થના કરી છે. ટીના અંબાણીએ પોતાની પોસ્ટમાં બહેન ઝરણા સાથેની જૂની યાદો તાજી કરતા કેટલીક તસવીરો પણ શેર કરી છે.

તેમણે હૃદયસ્પર્શી લખાણમાં જણાવ્યું કે, "મારી મોટી બહેન ઝરણા, જે ખરેખર મારા માટે બીજી માતા સમાન હતી, તેણે જ મારું કન્યાદાન ખૂબ પ્રેમથી કર્યું હતું. તેણે મને મારા નવા પરિવાર (અંબાણી પરિવાર) ને સોંપી હતી, પરંતુ સાથે જ એ વાતની પણ ખાતરી કરી હતી કે હું હંમેશા મારા જન્મના પરિવારનો એક અભિન્ન ભાગ બની રહું." પોતાની બહેનના વ્યક્તિત્વને યાદ કરતા ટીનાએ આગળ લખ્યું કે, ઝરણા તેમના પરિવારના બ્રહ્માંડનો સૌથી તેજસ્વી ચહેરો હતી.

હંમેશા પ્રેમ, હૂંફ અને હકારાત્મક ઉર્જાથી ભરેલી રહેતી હતી, ઝરણાની કૃપા અને ઉર્જા માત્ર તેમની બહેનો માટે જ નહીં, પરંતુ તેમના બાળકો અને પૌત્રો માટે પણ પ્રેરણાસ્ત્રોત હતી. તેમના નિધનથી પરિવારમાં એક એવું ખાલીપણું સર્જાયું છે જે ક્યારેય ભરી શકાશે નહીં. ટીના અંબાણીની આ સંવેદનશીલ પોસ્ટ જોયા બાદ સોશિયલ મીડિયા પર ચાહકો અને હસ્તીઓએ શોક વ્યક્ત કર્યો છે. યુઝર્સે કોમેન્ટ્સ દ્વારા ઝરણાના આત્માની શાંતિ માટે પ્રાર્થના કરી છે અને આ મુશ્કેલ સમયમાં ટીના અંબાણીને મજબૂત રહેવા તેમજ આ આઘાત સહન કરવાની હિંમત મળે તેવી સાંત્વના પાઠવી છે.

ટીના અવારનવાર તેની બહેનો સાથેના ફોટા સોશિયલ મીડિયા પર શેર કરતી હોય છે, જે તેમના વચ્ચેના અતૂટ પ્રેમનું પ્રતીક છે. રિલાયન્સ ગ્રુપના ચેરમેન અનિલ અંબાણી સાથે લગ્ન કર્યા બાદ ટીનાએ ફિલ્મી દુનિયાને અલવિદા કહી દીધું હતું. તેમની છેલ્લી ફિલ્મ 1991માં રિલીઝ થયેલી 'જીગરવાલા' હતી. લગ્ન બાદ તેઓ એક સફળ ઉદ્યોગપતિના પત્ની તરીકે સામાજિક અને પારિવારિક જવાબદારીઓમાં સક્રિય રહ્યા છે. ટીના અને અનિલ અંબાણીના બે બાળકો છે અને આ કપલને હંમેશા ચાહકો તરફથી ઘણો પ્રેમ મળતો રહ્યો છે.