વ્હાઇટ હાઉસમાં આયોજિત ઈસ્ટર લંચના ખાસ કાર્યક્રમ દરમિયાન અમેરિકી રાષ્ટ્રપતિ ડોનાલ્ડ ટ્રમ્પે ફરી એકવાર પોતાના વિવાદાસ્પદ અને આક્રમક અંદાજથી દુનિયાભરનું ધ્યાન ખેંચ્યું છે. શરૂઆતમાં મીડિયા માટે બંધ રખાયેલા આ કાર્યક્રમના અંશો જ્યારે લાઈવસ્ટ્રીમ થયા ત્યારે ટ્રમ્પની વાણીમાં વિરોધીઓ અને વૈશ્વિક સંગઠનો પ્રત્યેનો આક્રોશ સ્પષ્ટ દેખાયો હતો. ટ્રમ્પે પોતાના ભાષણની શરૂઆત ધાર્મિક સંદર્ભ સાથે કરતા જણાવ્યું કે, જે રીતે પામ સન્ડે પર ઈસુ ખ્રિસ્ત જેરૂસલેમમાં રાજા તરીકે પધાર્યા હતા, તેમ આજે લોકો મને પણ 'રાજા' કહીને સંબોધે છે. વિપક્ષ દ્વારા ચલાવવામાં આવતા "નો કિંગ્સ" વિરોધ પ્રદર્શન પર કટાક્ષ કરતા તેમણે ઉમેર્યું હતું કે, લોકો મને ભલે રાજા માનતા હોય, પરંતુ વાસ્તવિકતામાં મને એક બોલરૂમ બનાવવાની પણ મંજૂરી મળતી નથી. હાસ્યના ફુવારા વચ્ચે તેમણે પોતાના સમર્થકો પ્રત્યેની વફાદારીનો પુનરોચ્ચાર કરતા કહ્યું કે, જે વ્યક્તિ મારી સાથે ઉભી રહે છે તેના માટે હું અંત સુધી લડવા તૈયાર છું.

ટ્રમ્પે ભારપૂર્વક જણાવ્યું હતું કે અમેરિકાને ફરીથી મહાન બનાવવા માટે ધર્મ અને ભગવાનની આસ્થા અનિવાર્ય છે. જોકે ટીકાકારો તેમને બહુ ધાર્મિક વ્યક્તિ નથી માનતા, પરંતુ ઈવેન્જેલિકલ ખ્રિસ્તી સમુદાયના મોટા સમર્થનને જાળવી રાખવા માટે તેમણે આ મંચનો પૂરતો ઉપયોગ કર્યો હતો. આ પ્રસંગે તેમની સલાહકાર પાઉલા વ્હાઇટ અને પ્રચારક ફ્રેન્કલિન ગ્રેહામ પણ હાજર હતા, જેમણે ટ્રમ્પની જીત માટે પ્રાર્થના કરી હતી. મધ્યપૂર્વના તણાવ અને ઈરાન સાથેના સંઘર્ષ પર બોલતા ટ્રમ્પે દાવો કર્યો હતો કે અમેરિકા અને ઈઝરાયલે ઈરાનની તાકાતને તોડી પાડી છે અને મોટી જીત હાંસલ કરી છે. જોકે, ગ્રાઉન્ડ રિપોર્ટ્સ કંઈક અલગ જ વાસ્તવિકતા અને ઈરાનના પલટવારની આશંકા દર્શાવે છે, તેમ છતાં ટ્રમ્પે પોતાની રણનીતિને સફળ ગણાવી હતી.

સૌથી વધુ ચોંકાવનારો પ્રહાર ટ્રમ્પે નાટો (NATO) દેશો પર કર્યો હતો. તેમણે પશ્ચિમી સાથી દેશો પર નિશાન સાધતા કહ્યું કે નાટોએ અમેરિકા સાથે ક્યારેય યોગ્ય વ્યવહાર કર્યો નથી. જો ભવિષ્યમાં કોઈ મોટું યુદ્ધ (ધ બિગ વન) ફાટી નીકળશે, તો આ દેશો અમેરિકાની પડખે નહીં ઉભા રહે તેવી આશંકા તેમણે વ્યક્ત કરી હતી. બ્રિટન અને ફ્રાન્સ જેવા વર્ષો જૂના સાથીદારો પર કટાક્ષ કરતા તેમણે કહ્યું કે, ઘણા દેશો અત્યારે મદદ કરવાને બદલે માત્ર યુદ્ધ સમાપ્ત થવાની રાહ જોઈ રહ્યા છે. ફ્રાન્સના રાષ્ટ્રપતિ ઈમેન્યુઅલ મેક્રોન પરની તેમની ટિપ્પણીએ આંતરરાષ્ટ્રીય સ્તરે વિવાદ સર્જ્યો છે, જેના જવાબમાં ફ્રાન્સે આ નિવેદનોને પાયાવિહોણા ગણાવ્યા છે. ટ્રમ્પના આ 40 મિનિટના ભાષણે સ્પષ્ટ કરી દીધું છે કે તેઓ આગામી સમયમાં વિદેશ નીતિ અને આંતરિક રાજકારણમાં વધુ આક્રમક વલણ અપનાવશે.