આણંદ જિલ્લાની ઉમરેઠ વિધાનસભા બેઠકની આગામી 23 એપ્રિલે યોજાનારી પેટાચૂંટણી માટે ભારતીય જનતા પાર્ટી (BJP) ના ઉમેદવાર હર્ષદ પરમારે શનિવારે મુખ્યમંત્રી ભૂપેન્દ્ર પટેલની વિશેષ ઉપસ્થિતિમાં પોતાનું નામાંકન પત્ર ભર્યું હતું. આ પ્રસંગે યોજાયેલી વિશાળ સભામાં મુખ્યમંત્રીએ સ્વર્ગસ્થ ધારાસભ્ય ગોવિંદ પરમારને શ્રદ્ધાંજલિ આપી ભાજપના ઉમેદવારને જંગી બહુમતીથી જીતાડવા અપીલ કરી હતી.

વિશાળ રેલી અને સભા બાદ નોંધાવી દાવેદારી 

શનિવારે ઉમરેઠમાં ભાજપ દ્વારા એક વિશાળ જાહેર સભા અને પક્ષના કાર્યકરો તથા સમર્થકોની ભવ્ય રેલીનું આયોજન કરવામાં આવ્યું હતું. રેલી દરમિયાન મુખ્યમંત્રી ભૂપેન્દ્ર પટેલે નાગરિકોનું અભિવાદન ઝીલ્યું હતું. ત્યારબાદ, મુખ્યમંત્રીની હાજરીમાં ભાજપના સત્તાવાર ઉમેદવાર હર્ષદ પરમારે પોતાનું ઉમેદવારી પત્ર ચૂંટણી અધિકારી સમક્ષ રજૂ કર્યું હતું. આ પ્રસંગે રાજ્યના અનેક મંત્રીઓ, સાંસદો, ધારાસભ્યો અને પક્ષના પદાધિકારીઓ સહિત મોટી સંખ્યામાં નાગરિકો ઉપસ્થિત રહ્યા હતા.

સ્વ. ગોવિંદ પરમારને શ્રદ્ધાંજલિ, પુત્રને સોંપી જવાબદારી 

સભાને સંબોધતા મુખ્યમંત્રી પટેલે પૂર્વ ધારાસભ્ય સ્વ. ગોવિંદ પરમારને શ્રદ્ધાંજલિ અર્પણ કરી હતી. તેમણે જણાવ્યું હતું કે, ગોવિંદભાઈનો સ્નેહાળ સ્વભાવ, નમ્રતા અને જાહેર સેવાની લાંબી રાજકીય કારકિર્દી માત્ર ઉમરેઠ જ નહીં પણ સમગ્ર ગુજરાત હંમેશા યાદ રાખશે. આ નોંધપાત્ર ખોટ વચ્ચે, સ્વર્ગસ્થ નેતા અને પિતા દ્વારા છેવાડાના લોકો માટે કરવામાં આવેલા વિકાસ કાર્યોને આગળ ધપાવવાની જવાબદારી ભાજપે તેમના પુત્ર હર્ષદ પરમારને સોંપી છે.

પીએમ મોદીના નેતૃત્વ અને વિકાસકાર્યોની ખાતરી 

રાષ્ટ્રીય નેતૃત્વ પર પ્રકાશ પાડતા મુખ્યમંત્રીએ જણાવ્યું હતું કે, વૈશ્વિક અસ્થિરતા અને યુદ્ધો વચ્ચે પણ ભારતમાં જે શાંતિ અને સ્થિરતા છે, તે વડાપ્રધાન નરેન્દ્ર મોદીના મજબૂત નેતૃત્વનું પરિણામ છે. વડાપ્રધાને છેવાડાના માનવીની ચિંતા કરી વિકાસનું નવું પરિમાણ વ્યાખ્યાયિત કર્યું છે. સાથે જ, પટેલે આશ્વાસન આપ્યું હતું કે ઉમરેઠ મતવિસ્તારમાં શરૂ કરાયેલા અને આયોજન હેઠળના તમામ વિકાસના કામો રાજ્ય સરકાર દ્વારા અગ્રતાના ધોરણે પૂર્ણ કરવામાં આવશે.

23 એપ્રિલે ભાજપ અને કોંગ્રેસ વચ્ચે સીધી ટક્કર 

ઉલ્લેખનીય છે કે, 4 વખત ધારાસભ્ય રહી ચૂકેલા ગોવિંદ પરમારનું ગત 6 માર્ચે ટૂંકી માંદગી બાદ અવસાન થતાં આ બેઠક ખાલી પડી હતી. 2017 થી ભાજપના કબજામાં રહેલી અને મધ્ય ગુજરાતમાં રાજકીય રીતે મહત્વનું સ્થાન ધરાવતી આ વિધાનસભા બેઠક પર આગામી 23 એપ્રિલે મતદાન યોજાશે. ભાજપે હર્ષદ પરમારને મેદાનમાં ઉતાર્યા છે, જ્યારે કોંગ્રેસ તરફથી ભૃગરાજસિંહ ચૌહાણ ઉમેદવાર છે, જેથી આગામી દિવસોમાં અહીં ચૂંટણી જંગ અત્યંત રસપ્રદ બની રહેશે.