આણંદ જિલ્લાની ઉમરેઠ વિધાનસભા બેઠક પર યોજાનારી આગામી પેટા-ચૂંટણી માટેનું રાજકીય સમીકરણ હવે ફાઈનલ થઈ ગયું છે. ઉમેદવારી પત્રો પરત ખેંચવાની નિર્ધારિત સમયમર્યાદા આજે પૂર્ણ થતા, ચૂંટણી મેદાનમાં હવે કુલ 6 ઉમેદવારો બાકી રહ્યા છે. આગામી 23 એપ્રિલ 2026 ના રોજ યોજાનારા મતદાનમાં ભાજપ અને કોંગ્રેસ સહિતના પક્ષો વચ્ચે રસાકસીભરો મુકાબલો જોવા મળે તેવી શક્યતા છે.

મુખ્ય રાજકીય પક્ષો અને અપક્ષ ઉમેદવારોનું લિસ્ટ

ચૂંટણી તંત્ર દ્વારા જાહેર કરવામાં આવેલી સત્તાવાર યાદી મુજબ, ફોર્મ પરત ખેંચવાની પ્રક્રિયા બાદ 6 ઉમેદવારી પત્રો માન્ય રાખવામાં આવ્યા છે. આ બેઠક પર સત્તાધારી પક્ષ ભાજપ તરફથી હર્ષદ પરમાર અને મુખ્ય વિપક્ષ કોંગ્રેસ તરફથી ભૃગુરાજસિંહ ચૌહાણ મેદાનમાં છે. આ ઉપરાંત ભારતીય નેશનલ જનતા દળના મૌલિક શાહ પણ નસીબ અજમાવી રહ્યા છે. ચૂંટણી જંગમાં ત્રણ અપક્ષ ઉમેદવારો જિતેશકુમાર સેવક, નિરૂપા માધુ અને મહેન્દ્ર પરમારનો પણ સમાવેશ થાય છે, જે આ ચૂંટણીને ત્રિપાંખિયો કે બહુપાંખિયો જંગ બનાવવા તૈયાર છે.

ધારાસભ્યના અવસાન બાદ ખાલી પડી હતી બેઠક

ઉલ્લેખનીય છે કે, ઉમરેઠ વિધાનસભા બેઠક પર પેટા-ચૂંટણી યોજવાની જરૂરિયાત ત્યારે ઉભી થઈ જ્યારે અહીંના વર્તમાન ધારાસભ્ય ગોવિંદ પરમારનું ગયા મહિને દુઃખદ અવસાન થયું હતું. તેમના નિધન બાદ વિધાનસભાના અધ્યક્ષ દ્વારા આ બેઠક ખાલી જાહેર કરવામાં આવી હતી, જેને પગલે ચૂંટણી પંચ દ્વારા પેટા-ચૂંટણીનું જાહેરનામું પ્રસિદ્ધ કરવામાં આવ્યું હતું. ગોવિંદ પરમારના વારસાને જાળવી રાખવા માટે ભાજપ અને તે કબજે કરવા માટે કોંગ્રેસે એડીચોટીનું જોર લગાવ્યું છે.

પ્રચાર પ્રસાર અને મતદાનની તૈયારીઓ

ઉમેદવારોની આખરી યાદી પ્રસિદ્ધ થતાની સાથે જ હવે ચૂંટણી પ્રચારનો બીજા તબક્કાનો પ્રારંભ થઈ ગયો છે. આગામી 23 April ના રોજ મતદાન પ્રક્રિયા હાથ ધરવામાં આવશે. વહીવટી તંત્ર દ્વારા મુક્ત અને ન્યાયી વાતાવરણમાં ચૂંટણી પૂર્ણ થાય તે માટે તમામ મતદાન મથકો પર જરૂરી સુવિધાઓ અને ચુસ્ત પોલીસ બંદોબસ્તનું આયોજન કરી લેવામાં આવ્યું છે. રાજકીય પક્ષો દ્વારા હવે મતદારોને રીઝવવા માટે સભાઓ અને ડોર-ટુ-ડોર પ્રચાર તેજ કરવામાં આવશે.