ગુજરાતમાં ચાલુ ઉનાળાની સીઝનમાં હવામાનમાં ફરી એકવાર મોટો ઉલટફેર જોવા મળ્યો છે. રાજ્યમાં સક્રિય થયેલા વેસ્ટર્ન ડિસ્ટર્બન્સ અને સાયક્લોનિક સર્ક્યુલેશનની અસર હેઠળ સૌરાષ્ટ્રના વાતાવરણમાં અચાનક પલટો આવ્યો હતો. કાળઝાળ ગરમી અને અસહ્ય ઉકળાટ વચ્ચે જામનગર અને દેવભૂમિ દ્વારકા જિલ્લામાં ધૂળની ડમરીઓ, ગાજવીજ અને 30 થી 40 કિમીની ઝડપે ફૂંકાતા પવન સાથે કમોસમી વરસાદ વરસતા જનજીવન પ્રભાવિત થયું હતું. જામનગર શહેરમાં વહેલી સવારથી જ સૂર્યનારાયણનો આકરો મિજાજ જોવા મળી રહ્યો હતો અને લોકો ગરમીથી પરસેવે રેબઝેબ હતા.

જોકે, બપોર બાદ અચાનક વાતાવરણ પલટાયું અને આકાશ કાળા ડિબાંગ વાદળોથી ઘેરાઈ ગયું હતું. વરસાદ પડતા પહેલા ફૂંકાયેલા તેજ પવનને કારણે શહેરના માર્ગો પર ધૂળની ડમરીઓ ઊડી હતી, જેના કારણે વિઝિબિલિટી ઘટતા વાહનચાલકો અને રાહદારીઓ મુશ્કેલીમાં મુકાયા હતા અને થોડા સમય માટે વાહન વ્યવહાર થંભી ગયો હતો. ધૂળના વંટોળ બાદ જામનગર અને લાલપુર પંથકમાં હળવાથી મધ્યમ વરસાદી ઝાપટાં પડ્યા હતા. આ માવઠાને કારણે રસ્તાઓ પાણી-પાણી થઈ ગયા હતા અને વાતાવરણમાં ક્ષણિક ઠંડક પ્રસરી હતી.

જોકે, આ કમોસમી વરસાદે ખેડૂતોના જીવ અધ્ધર કરી દીધા છે. ઉનાળુ પાક જેવા કે તલ, બાજરી અને મગના વાવેતરને આ તોફાની પવન અને વરસાદથી મોટું નુકસાન થવાની ભીતિ સેવાઈ રહી છે. દેવભૂમિ દ્વારકા જિલ્લામાં મેઘરાજાનો મિજાજ જામનગર કરતા વધુ આક્રમક જોવા મળ્યો હતો. ખંભાળિયા, દ્વારકા, કલ્યાણપુર અને ભાટિયા પંથકમાં ગાજવીજ સાથે વરસાદી માહોલ જામ્યો હતો. ખંભાળિયામાં બપોરે એક વાગ્યાની આસપાસ જોરદાર વરસાદી ઝાપટું તૂટી પડ્યું હતું. વરસાદની સાથે જ અનેક વિસ્તારોમાં વીજ પુરવઠો ખોરવાઈ જતાં નગરજનોને અંધારપટ અને બફારાનો સામનો કરવો પડ્યો હતો.

જિલ્લામાં સૌથી વધુ અસર ભાટિયા પંથકમાં જોવા મળી હતી. ભાટિયામાં બપોરે ભારે પવન અને વીજળીના કડાકા-ભડાકા સાથે તોફાની વરસાદ શરૂ થયો હતો. ટૂંકા ગાળામાં જ અડધા ઈંચથી વધુ વરસાદ ખાબકતા ભાટિયાના મુખ્ય માર્ગો પર નદીઓ વહેતી હોય તેવા દ્રશ્યો સર્જાયા હતા. સરકારી આંકડા મુજબ ખંભાળિયામાં 4 મી.મી. અને કલ્યાણપુરમાં 3 મી.મી. વરસાદ નોંધાયો છે, પરંતુ ગ્રામ્ય વિસ્તારોમાં તે વધુ હોવાનું જણાય છે. હવામાન વિભાગની આગાહી મુજબ, હજુ આગામી 24 કલાક દરમિયાન સૌરાષ્ટ્ર અને કચ્છના કેટલાક ભાગોમાં પવન સાથે વરસાદી માહોલ જળવાઈ રહેવાની શક્યતા છે.

આ પ્રકારના 'માવઠા'ને કારણે માર્કેટ યાર્ડોમાં પણ ચિંતા પ્રસરી છે. ખુલ્લામાં રાખેલો જણસીનો જથ્થો પલળી ન જાય તે માટે યાર્ડ સત્તાવાળાઓ દ્વારા સાવચેતીના પગલાં લેવામાં આવી રહ્યા છે. ખેડૂતોને પણ તૈયાર પાક સુરક્ષિત સ્થળે ખસેડવા સૂચના અપાઈ છે. એક તરફ કાળઝાળ ગરમીથી લોકોને આંશિક રાહત મળી છે, તો બીજી તરફ કુદરતી આફત સમાન આ કમોસમી વરસાદે જગતના તાતની મહેનત પર પાણી ફેરવી દીધું છે. ખાસ કરીને જે ખેડૂતોનો પાક લણણીના આરે હતો, તેમને આ પવન અને વરસાદથી આર્થિક ફટકો પડવાની શક્યતા છે. વહીવટી તંત્ર દ્વારા પણ વરસાદી અસરવાળા વિસ્તારોમાં નુકસાનીનો અંદાજ મેળવવા તજવીજ હાથ ધરવામાં આવી છે.